整體大市氣氛仍然唔錯，有長和系做定海神針。長實（001）與和黃（013）俱升50仙。年底之前，個市反覆向上，每隔幾日，就有火車頭股帶住，短期內長和系會係呢類股份。
長實C輪：風騷榜上，長實C輪9897排第4，收18仙，升幅23%，有13球易手。呢隻係末日輪，下周二最後買賣。唔使流晒口水，長實有勢，買其他長實C輪一樣有運行，最佳孖寶係2249同2258，昨日冇升到，啱炒。
2249明年2月到期，輪價58仙，溢價2.2%，槓桿率11.9倍（有效8.6倍），引伸波幅24.0%。2258亦係明年2月夠鐘，輪價51仙，溢價2.7%，槓桿率13.6倍（有效9.2倍），引伸波幅22.9%。走慣窩輪鱷魚潭嘅，都知道呢兩件係長實C輪主角。
華能C輪：國內電力股悄然有動靜，華能（902）成交由14.1球大增至24.7球，股價則由6.15元爬上6.25元。華能嘅慣性走勢係，方向一旦確定，會有幾日持續。
博華能上多幾日，炒C輪，揀4501，隻輪掛牌兩個月，輪價43仙，溢價7.4%，槓桿率14.5倍（有效6.9倍），引伸波幅28.3%，明年6月至到期，咁嘅溢價唔算貴。
中海油C輪：近日油價雖回落，但中海油（883）表現尚穩，昨日收4.275元，升2.5仙，芬佬支配股價，個勢仍然向好。
炒中海油C輪，4563係最佳對象，明年9月到期，輪價46仙，溢價1.5%，槓桿率9.3倍（有效7.1倍），引伸波幅15.1%。
章盛