買樓買車係唔少人嘅願望，興勝創建上水低密度住宅高爾夫景園，鄰近翠綠嘅高爾夫球場，以追求悠閒生活嘅買家做銷售對象。
佢哋今個禮拜日首次喺現場舉辦睇樓兼試車活動，到時，現場會放置幾部全新型號日產名車，做車展之餘，睇樓人士重可以親身試揸，同時可以實地參觀示範單位，兩者兼得。
為咗將活動搞得有聲有色，重搵嚟男藝人譚耀文、女星吳文忻等助陣。
興勝項目董事周嘉峰話，個樓盤不經不覺賣出三十二伙，分層呎價三千五百，頂層空中王國，就要四千七。
配合加推第三座四伙，特設一百五十至一百八十日特長成交期。第二座重有八伙封緊盤，準備留畀投資者出價。
另外，中原地產會送出汽車美容及油券優惠，名額五個，總值十四萬。
未來一個月，差唔多日日都有豪宅截標，旺到咁，都算近年罕見，個盤少啲特色，都幾難突圍而出。
啱啱加入招標行列嘅壽山村道23A號獨立屋，就以面積稱霸。
大屋由永傑集團陳澤儒個女私人持有，佔地近一萬七千呎，上蓋大屋實用面積超過六千七百呎，內有七間套房、四個大廳、七個平台、兩個天台，同加埋接近一萬呎嘅前後花園。
壽山村道23A號獨立屋將於下月十五日截標，同日截標嘅，重有另外兩個豪宅。
業主意向價一億四千萬，比九七高峯期購入價高兩成幾。
日本腦炎又嚟料，今次輪到海怡半島，二手交投會唔會受影響尚未知，不過，對於一班勇字當頭嘅炒家，可能係另一次執筍貨機會。
今年中，加州花園都爆發過日本腦炎個案，中原龍智烽憶述，當其時，有個別業主即時降低放盤叫價五至十個巴仙，屋苑平均呎價亦即時由三千跌落二千八，吸引到炒家入市。
好似榕翠徑一間雙號屋，六月底炒家入貨價五百六十五萬，個幾月前以六百三十五萬沽出，賺七十萬。𠵱家屋苑呎價已經上番去三千二百幾。
政府話，好多工冇人做，實情何解有工冇人做，睇怕高官厚祿嘅人，唔會咁易了解。好多人，尤其啱啱畢業嘅後生仔女，都想份工有前途，起碼都搵到錢，坊間一般工種，未必一定啱佢哋口味。
近排以地產行業最吃香，美聯物業今個禮拜日，喺奧海城二期地下，聯同青年協會舉辦招聘日，時間係朝十一至晚七，入職學歷中五或以上，目標係請二百個前線人員。
美聯董事總經理葉潔儀話，地監局數字顯示，十月份持牌經紀接近萬八名，比今年初大增兩成，係二千年以來新高。
永泰與南豐合作嘅火炭半山豪宅晉名峰，噚日招待VIP參觀。聽講，由於發展商想將睇樓嘅行程，搞得尊貴一啲，同一般中小型住宅，萬人空巷排隊睇樓情況有所分別，所以各間地產代理，限量帶客參觀。每間代理行全日各帶八至十個準買家，普遍係沙田區內嘅廠家客。
相信有興趣嘅準買家，都係出價洽購，多過去現場排隊睇樓。
發展商對呢個盤甚為重視，聽聞，富聯行政總裁鄭維新，上個禮拜六睇完一次示範單位後，噚日黃昏時段又再去視察。
電郵地址：
