新濠國際（200）同澳洲幫合作一事，雖然澳洲幫已經公布咗，但新濠就遲遲未復牌，相反由家姐主理的信德集團（242）就日日升個唔停，噚日又升5.88％，收7.20元，成交金額3.8億元，原來又創新高。
經紀黃話，信德升得勁，據講係因為公司最近好勤力與投資者會面，兼且市場又憧憬老竇啲澳門旅遊娛樂會陸續有資產注入。
另外，早前佢公布投資澳門南灣項目，據聞分析員計完條數後，話個project值錢，又幫信德資產值加多幾分，但小初就心諗，可能因為細佬隻新濠仍未復牌，炒家轉移陣地推波助瀾下，信德股價唔升至奇。
查實連JP摩根都話揸咗澳門實德（487）5％股權，擺明芬佬仍然熱衷澳門概念，睇嚟呢個浪重未炒完。
另外，經紀陳噚日同小初saysorry，皆因佢收錯料以為英皇中國（296）噚日復牌，點知重未搞掂。小初問佢點解咁失策，佢話聽聞係技術原因，應該好快搞得掂。
慕容小初