Hi，我叫阿Sam，曾經係賽車手，跑過澳門大賽車、北京拉力賽等，現時係基亞車隊總監，今年車隊派出八架車挑戰東望洋賽道。未來一連四日，我會用自己專業意見，喺呢度同大家講講車經。
睇番第一日排位及練習賽，發覺香港班新車手都有進步，好似新手賽嘅東亞運動會盃1600cc，練習時意外少咗、時間快咗；雷諾方程式方面，雖然練習賽有六、七架車炒埋一碟，其中兩架重TotalLost，每架五十萬港元成本，呢次意外就唔見咗成百萬，好彩我車隊六架車都無事，如果唔係……。
今屆澳門大賽車，參賽香港車手其中以李英健、關兆昌、詹家圖、李萬祺等等都要留意，我希望健仔面對歐洲頂級車手時可以show吓自己技術；而Charles關兆昌，則希望佢可以反勝贏總冠軍，順便賀吓佢就快做新郎哥；詹家圖年紀輕輕已有四年澳門大賽經驗，若加以培育，隨時成為未來香港頂級車手。至於開賽前十日先決定參戰嘅李萬祺，估計Henry暫時重未摸熟架雷諾；不過佢對東望洋賽道瞭如指掌，隨時有機會快過詹家圖返終點。
文：許冠權