萬綺雯同尹天照主演嘅亞視劇集《我和殭屍有個約會Ⅲ之永恒國度》播得如火如荼，呢套劇集將喺下月中播完，但近日亞視呼籲觀眾打電話同上網投票，嚟決定萬綺雯同尹天照兩位主角嘅下場，而觀眾嘅意願似乎都唔想佢哋死。
馮仁昭聽講《殭屍Ⅲ》嘅編劇陳十三之前構思時，佢因為想營造淒美結局，所以就安排由尹天照飾演嘅況天佑同萬綺雯飾演嘅馬小玲死去作結，佢都估唔到觀眾反應咁大，重喺網上發表意見，拯救兩位主角出「鬼門關」，陳十三再三考慮，佢都決定改結局，免萬綺雯同尹天照一死。
陳十三噚日喺電話度話：「我哋下個禮拜係會拍過個新結局，我最初係覺得佢哋死係好圓滿，但如果觀眾唔想佢哋死，我都決定畀佢哋幸福啲，等佢哋可以happyending。」身為主角嘅尹天照同萬綺雯，佢哋噚日分別話拍乜嘢結局都冇所謂，最緊要係觀眾睇得開心。
三位得獎亞姐日前幫亞視拍攝○五年月曆海報，佢哋三個人都着上性感服裝影相，香豔得嚟重好有嘉年華情調。佢哋三個噚晚重獲邀出席○五年亞洲電視節目巡禮嘅片段啟播儀式，為下年嘅亞視節目造勢。
王秀琳（Mango）前晚去咗尖沙嘴出席寰宇慰勞宴，問到尹天照涉嫌非禮佢一事進展成點，Mango就話：「早排有差人打畀我叫我放心，佢哋話已經做緊嘢。」Mango重覺得早排亞視有偏幫尹天照之嫌，佢亦深信以後都唔會有機會撞到尹天照。
最近同霍啟剛傳緋聞嘅郭晶晶，雖然口口聲聲話下個月就會返跳水隊繼續訓練，重話希望大家將視線放喺跳板上，但噚日又有內地消息指，郭晶晶已經喺半個月前秘密同內地《巨人游戲》劇組簽約。據《巨》劇嘅製片人透露，佢哋重已經同有關部門協調好，二十五號郭晶晶就會進行拍攝，佢喺劇中會飾演賢妻良母。
名模周汶錡同吳嘉龍前晚去中環出席由愛滋寧養服務協會舉行嘅籌款活動，重分別示範設計師嘅服裝，問周汶錡知唔知陳嘉容子宮生朱古力瘤，佢話：「我啱啱喺巴峇返，唔知佢有事，不過呢啲嘢其實好普遍，我自己就定期一年驗身一次，做女仔係煩啲㗎啦，不過為自己設想就唔可以怕醜，要錫自己多啲㗎嘛。」
