昨日講開，滙控C輪前日跌突，要趁低買。滙控C輪4445收82仙，升6仙（8%），朝早低位撈貨嘅又有魚有肉。同類輪4441收96仙，則只升得3仙（3%），你追我趕，𠵱家要4441，有4445則沽4445換4441。
電盈C輪：電盈（008）繼續有爛泥味，收4.80元，唔見1格。C輪9814慘情，收14.1仙，跌17%。扒逆水，細注博9814，博正股忽然失驚無神整幾毫子上去。隻輪有時癲癲哋，好似上周二，正股由4.775元上到4.85元，只係進帳3格，但隻輪則由11.5仙衝上18仙，咁就爆升57%。隻輪愈近到期日，溢價就不斷收縮，賭呢件，要記住只落怡情注碼，小貪可以，大貪不能。
唔想咁刺激，可選擇4664，明年6月到期，輪價46仙，溢價11.2%，槓桿率10.4倍（有效5.4倍），引伸波幅36.2%，弊在成交太奀。
國壽C輪：成交金額最勁嘅係恒指C輪4572，有1.22億元，其次就係國壽C輪4524，有0.93億元貨易手，國壽（2628）搵緊策略性合夥人，亦承認同美國股神畢菲特相識，第日股神做埋股東唔出奇，國壽將如虎添翼，最近幾日高位消化緊，遲吓再向上推進，炒家收定貨先。4524收52仙，升6%，正股升0.9%。4524明年3月到期，溢價5.5%，槓桿率11.2倍（有效6.9倍），引伸波幅29.9%。
同類輪4492收52仙，只升1仙。買國壽輪，4492靚過4524少少，隻輪明年3月到期，溢價4.7%，着數啲，槓桿率則一樣。
章盛