奧斯卡女星雲妮絲惠嘉（ReneeZellweger）同曉格蘭特（HughGrant）最近喺新片《BJ單身日記：愛你不愛你》中再度合作，佢哋日前喺洛杉磯接受本報訪問，雲妮就大談佢嘅健康增肥法，而曉格蘭特就自爆片中場打交戲，好似佢細個同同學打交咁。
雲妮絲惠嘉為拍呢套片極速增肥，最近又極速瘦身，佢話：「我作為一個女演員，如果真係想增肥同減肥，當然冇乜難度，我可以話你知點樣增肥，但係我唔想答點減肥，因為我唔係專業人員，唔想教錯人。」
原來雲妮增肥嗰陣，係有營養師計好晒條數同整好啲嘢畀佢食，佢話：「我嗰陣肥得嚟好健康，食好多蛋白質嘅食物，當中有好大份嘅早餐，同好多肥油嘅沙律醬，然後全日都係咁，有時好飽都要食到第五餐，就好似返工做嘢咁，唔想都要做，有時我唔想一日裏面飲第三次勁重蛋白質嘅奶昔，但我都要咁做，因為我要完成我嘅工作。」
而曉格蘭特就講及戲入面同雲妮男友哥連卓夫（ColinFirth）打交爭女嘅趣事，佢話：「我記得好多年前喺學校同人打交，我哋扯住對方嘅頭髮，同戲入面嗰場打交戲有幾分相似，所以喺戲入面我特登講咗句對白，我話你扯住我啲頭髮呀。」
阿曉近年產量少，問佢係咪想轉做其他嘢或演出音樂劇時，佢就話：「咁又唔會，我係一個完全冇音樂感嘅人，四十四年嚟都係咁，大家咪以為我個樣冧到女就一定有番兩吓舞技，講個秘密你哋知，其實我跳舞嗰時好樣衰㗎！」
特約記者JoleighLo洛杉磯專訪