經紀陳噚日先至品題完英皇國際（163），話佢會母憑子貴，趁英皇中國（296）供股投資澳門賭場食胡，真係話口未完，收市無耐經紀陳電話又殺到，話英皇中國將於今日復牌，重揚言隻股會一反供股傳統，股價唔會跌咁講。
原本傳英皇中國1拆10後，1供5，以拆細後價格0.68元供股，但經紀陳話又有新版本，就係首先批咗佔已擴大後股本16.67％新股，然後再供股。
由於係大比例供股，所以若果想股東畀錢供嘅話，經紀陳話點都要挾上先得。重有，佢話呢期芬佬對澳門賭業概念趨之若鶩，唔排除今日亦會見到佢哋蹤影，呢點就信不信由你，反正今日就會見真章。
另外，上星期批股後一直升唔停牌嘅邁特科技（1031），噚日繼續上揚，但波幅就唔細，最高見過0.19元，收0.181元，升2.26％，真係膽細啲都被震出來。經紀陳話，江湖一直傳聞有外資大隻佬收貨，所以日日都見到外資大行掛牌。但日日咁大成交都無咩消息，真係好難明白。
慕容小初