自有賭波以後，各報紛紛擴充足球版，對英西意德四大歐洲足球報道，甚為詳細。左丁山偶有賭波，注意賠率，但更注意足球版嘅內容，如果足球版只係講賭，有乜好睇？
芸芸足球特刊之中，《明報》嘅星期日足球特輯比較突出，選材有眼光，特寫夠醒。例如上星期講荷蘭兩大前鋒古華特與雲尼斯達萊就好過癮。睇咗先至知：古華特與雲尼斯達萊係同年同月同日生（一九七六年七月一日），際遇迥異，古華特少年得意，十九歲就為阿積士射入一球，擊敗祖雲達斯攞歐洲聯賽冠軍盃，當時雲尼斯達萊重係踢緊荷蘭乙組。但現在呢？雲佬炙手可熱，係曼聯第一前鋒，而古華特就經常屈居紐卡素後備。
呢個故事寫得好好，閱讀性頗高，點知香港編輯鍾意八卦（佢哋以為讀者鍾意八卦），係要加個box，從玄學角度講同年同月同日生，因出生時辰不同，影響命運，重話問玄學家麥玲玲指點迷津，於是露出馬腳。《明報》記者指一九七六年七月一日即係農曆丁未年丙午月丙寅日，麥玲玲評論話該日五行不調，火旺，上午九時至下午三時出生的人，由於太陽影響，令火更旺，五行不能調和，命運不大理想，三時後至黃昏出生，命運較佳，雲尼斯達萊可能在這段時間出生。
一九七六年係龍年噃，點會係丁未年（羊年）呀？唔信。於是翻查萬年曆，咦，一九七六年七月一日係丙辰年乙未月甲寅日，與《明報》所寫之丁未年丙午月丙寅日完全不同，記者唔識八字算命，寫錯唔出奇，但玄學專家唔查清楚萬年曆，照噏可也，又係幾出奇。