向海嵐噚日揸咗寶馬5系新車返無綫將軍澳電視廣播城，為聽晚嘅台慶綵排。
以馮仁昭所知，向海嵐自九八年當選港姐冠軍後，一直都係揸緊港姐冠軍嗰架獎品本田Accord座駕代步，不過近年佢嘅事業發展唔錯，又賺到啲錢，向海嵐咁啱又睇中寶馬呢部5系新車，於是就決定換車。
據知向海嵐呢部新車車價近五十萬，佢係用部舊車tradein再補錢換嘅，向海嵐話：「我賣咗部舊車時，都好唔捨得，始終都揸咗六年，點都有感情，加上我又唔係咁鍾意成日換新車嘅人，我一定會好錫架車。」
問到向海嵐新車落地，邊個係佢第一個乘客，佢話：「咪我爹哋媽咪囉，因為佢哋話要跟我攞新車，所以順理成章咪一定要車佢哋囉！」
李克勤噚日接受港台訪問，佢話發夢都估唔到，英超聯班霸曼聯會搵佢主唱國語同廣東版會歌，曼聯重計劃安排克勤去奧脫福球場同曼聯全隊球員一齊拍MV。
克勤話到時會做小fans，搵偶像堅尼同埋朗尼簽名，最好就係有機會同佢哋同場較量偷吓師啦。
林心如早前再為「LF豐胸瘦身品牌」以一身PartyLook拍攝宣傳相，豐胸後嘅林心如重大騷33B上圍，問到佢係咪想轉走性感路線，佢以唔鹹唔淡嘅廣東話講：「其實身材有看頭的確擴闊咗我喺演藝界嘅發展空間，以前一直只係畀人清純嘅感覺，𠵱家就散發出另一種女人味，但我堅持係健康嘅性感美。」
薛凱琪噚日接受商台訪問，提到前晚欣賞日本組合LovePsychedelico演唱會，薛凱琪話投入到又跳又叫，佢話演唱會雖然冇特別舞台設計同服飾，但歌手唱功出色，散發懾人魅力，缺乏運動嘅佢重話完騷後雙腿好痠痛。
鍾欣桐同陶紅主演嘅電影《公主復仇記》喺上周末成為最收得嘅電影，鍾欣桐即刻放下心頭大石，重話要出錢邀請所有工作人員大吃一餐，導演重大讚佢嘅演技有進步，鍾欣桐嘅朋友重話佢有機會提名出年嘅「最佳女主角」，令到佢鬼咁開心。
成立五十幾年嘅東映株式會社，拍過唔少電影，洲立攞咗呢啲電影DVD發行權，下個禮拜就喺香港推出，其中有松坂慶子主演嘅《火宅之人》。聽講當年松坂好紅，成龍去到日本話想見吓呢位靚女，點知當松坂去到酒店搵成龍，咁啱成龍間房冇鎖門，松坂就推門入去見到成龍只係着住條底褲瞓喺地度，嚇到松坂大叫，好鬼尷尬。
