蘭西情報課:<br>新地話將軍澳樓應賣市區價

蘭西情報課:
新地話將軍澳樓應賣市區價

樓市熱爆,發展商繼續撥火,催谷樓價狂升,素有重災區之稱嘅將軍澳,時至今日,起碼重有約五百個貨尾單位,而且短期之內,地鐵將軍澳站與調景嶺站,會再有兩個全新大盤出台,新供應陸續有來。
區內貨尾,閒閒地賣到成四千蚊一呎,新地周國賢重嫌未夠喉。佢聲稱,將軍澳新盤現價,嚴重落後大市,呎價理應同市區個別新盤看齊,佢地再有新盤出,誓必調番高個售價咁話。
唱到咁好,唔難理解,新地將軍澳中心七十幾個貨尾,即日起以原價三千八至四千蚊清貨。
同時,全新嘅第十三座全幢一百四十伙,亦有機會喺今年底開售,𠵱家係時候鋪定路。到時賣唔賣到市區新樓嘅價錢,已經係後話,大前提係,令到買家確信,現價過低,要買趁早。

發叔高價放會展
鄉議局主席劉皇發或有關人士,月前標售力寶一層,叫價由每呎六千幾勁升至九千,至今不果。
最新消息話,發叔間私人投資公司用緊嘅會展高層,放盤價更高達萬七蚊一呎,市場嘩然,直情追過樓市高峯期。不過,代理好快澄清,原來個價係以實用面積計,如果以慣用嘅建築面積計,則約一萬,同中環皇九高層靚景差唔多。
蘭西記得,發叔個單位九四年入貨價,建築面積計大約萬四蚊呎,由於佢諗住自用,要揀無敵海景兼對正𨋢口,但當時會展賣散單位唔多,發叔不惜高價接貨,現市價要出貨難免要蝕。

黎汝遠做攝石人
投資者黎汝遠向來高調,人哋代理開舖,佢經常出席。利記跑馬地名門專店噚日開張,佢又去剪綵。
佢對大坑名門好感興趣,當長實黃思聰介紹四房單位時,佢已經好留心,一講到入門價二千二百萬,黎汝遠立刻話,如果真係呢個價就即買。
事先張揚,話明捧場,十足十宣傳大使,難怪發展商與代理鍾意搵佢做show。

京士活傳大失血
近年大張旗鼓嘅京士活,規模雖不及中記、美記,但隨住樓市向好,唔經唔覺已有九間分行,人手逾三百。
市場噚日盛傳,佢哋一日之內流失六十人,主要係天水圍嘉湖山莊、沙田第一城與沙田中心分行。
不過,傳聞甚多,有話係員工不滿某執董作風;亦有話係謠言,同業有心中傷。截稿前,未聯絡上京士活方面回應。

晉名峰落本宣傳
火炭晉名峰示範終於曝光,噚日招待傳媒與代理參觀。永泰李簡鳳玲話,尖東售樓處與示範單位,成二萬呎,用咗二千萬裝修。
佢哋請到雅典奧運,負責開幕閉幕嘅公關公司JackMorton,策劃晉名峰介紹環節,來頭幾猛。
另外又搵嚟電台DJ鄭啟泰,喺未來兩個星期內,長駐售樓處講解物業。
電郵地址:nancy@appledaily.com

會展中心靚海景單位,以實用面積計,每呎叫價個別高達萬七。

利記名門專舖開幕,黎汝遠(左)又再畀面出席兼收風。