中國對香港嘅關懷同愛護，真係無微不至，繼自由行、企業自由行之後，又繼續放水，今次係准許個人財產對外轉移，初步估計涉及嘅財富達數千億元。
內地准許私產滙出，最大得益者肯定係香港，無論股市同樓市，今後一兩年內，會陸續有「北水」注入，對市道可起到穩中帶升嘅作用。噚日港股能夠喘定回升，頗大程度係受呢個消息刺激，恒指升78點，國指升32點。
國指噚日回升，調整好大機會已完成，下一個升浪，目標指向5000至5200。吉林化工（368）係石化股中最強勢一隻，高收2.425元，升3.2%，幾間大行繼續係咁買，相信貨源好快收乾，初步仍係以2.85元為目標；下一站，應過3字頭。
江西銅業（358）前日大跌，主要係受上海期貨交易所期銅合約跌停板影響，但噚日期銅價格已回升。江銅由月初嘅低位4.125元回升，到本周一的4.80元，正好趁勢進行調整，噚日收4.55元，升1.1%，若升破4.80元阻力，而又有大成交支持，將有極大機會4次見頂（5.05元）而破，創出新高，初步目標係6元。
今年第3季，江銅盈利2.74億元人民幣，與去年同期比較增60%，比第2季的2.96億元人民幣，下跌7.4%，但第2季有「期貨套期保值」獲利1.82億元人民幣，實際經營盈利只有1.14億元人民幣。
首3季上海3個月期銅平均價為每噸26177元人民幣，上升51%，第3季（7至9月）平均價為26243元人民幣，10月高價曾接近29400元人民幣，第4季期銅價比第3季高，盈利應再有進。
保守估計江銅04年盈利可上升至13億元人民幣，每股盈利45.4港仙，05年可上升至55仙，05年預測PE8.2倍，大行建議購入，目標價6元，現水平上車重有30%上升空間。
講番呢輪熱炒嘅二三線股，噚日建議吸納嘅中信21世紀（241）、遠東發展（035）同銀建國際（171），都由低位回升。遠展升勢最勁，高收3.525元，大升6%；銀建高收4.275元，亦有4.9%進帳；21世紀收2.75元，升3.7%；遠展同銀建走勢已突破，21世紀重造緊三角形，一破位而上，肯定「坐三」，好大機會「望四」。
郭兆誠