當賣緊肝藥嘅生命科技（1180）都話有意進軍賭業之時，小初就響度諗，當人人都話搞之時，究竟澳門賭業概念炒完未呢？但那邊廂，小賭王的新濠國際（200）又話同澳洲富豪合作大搞賭場生意，投資金額重係億億聲，似乎人地重係雄心壯志大把嘢搞，睇落呢個浪可能未必咁快玩完。
經紀陳亦有同感，佢話聽聞澳門好多賭廳廳主，見人哋玩得㷫烚烚，家陣先至開始盤算夥拍香港上市公司搞合作，呢一個澳門賭業浪潮，斷估都要等埋佢哋上咗車先至完。
佢又話，好似英皇中國（296）由11月初起停牌到𠵱家，江湖傳聞佢哋供股集資進軍濠江賭業，雖然停咗咁耐都尚未有消息，但冇停牌嘅阿媽英皇國際（163）就一路升唔停，似乎係認同英皇中國染指賭業，買家博英皇可能水漲船高。
查實英皇最近股價拾級而上，噚日再斬四両，升2.82％，收9.10元，成交金額719萬，唔講唔覺，原來已經超越52周新高，當然呢系股票咩來頭，大家心中有數。
慕容小初