大閘蟹大熱，某食肆搞搞新噱頭——「無綑綁游水大閘蟹」（乍聽有點像「無睡意幸福傷風素」），自由自在、無拘無束的大閘蟹，暢泳在沸騰的熱水當中，看着大閘蟹的泳姿在剎那間凝住，顏色變紅，食得。教我想起年前另一流行之活剝生吞食譜——「高熱石春桑拿蝦」（乍聽有點像《火熱動感LaLaLa》），先將燒至高溫的石春放在透明煲中，然後將鮮蹦活跳的基圍蝦及燒酒配料一併倒入煲中，立即緊蓋煲蓋，燒酒碰上高溫石春化成一陣酒蒸氣，基圍蝦們在煲內燙得生蝦咁跳，撞得呯嘭作響，侍應小姑娘皺着眉頭、抿着雙唇死按煲蓋，但擰歪面不忍顧看，煲內片刻便是一片死寂，小姑娘隱約雙目含淚地打開煲蓋說句：「趁熱慢慢食」。只見煲內蝦屍橫遍野，有點像是集中營中的劫後境況，食慾當堂全消。
年紀愈大，愈不想看到生勾勾的生物在席前被切兩切、滾兩滾變成食物，雖然放在廚房中煮其實也是一樣，但冇眼屎乾淨盲心安理得。吃龍蝦刺身最驚嗰個有頭冇身嘅龍蝦頭對住自己係咁郁對觸鬚，總覺得龍蝦在咽最後一口氣前認清仇人，下世報仇，或者趁閣下俯頭食其肉時乘機拮你對眼，乜仇都報晒。
據講用酒餵蟹，待蟹喝醉後，蟹不會再打橫行，反而會打直行，「醉酒打直行大閘蟹」，會唔會重夠噱頭呢？