今日係世界盃亞洲外圍賽嘅大日子，因為係由香港隊與同組嘅中國隊出戰！事前全世界都睇死：香港係中國嘅一個特區，十三億人民要威到盡，出唔到線，分分鐘火燒美日大使館發洩，加埋中國揼水屍爬自由行，因此好多人都覺得香港隊輸多過贏。
點知好衰唔衰，中國隊入球太少，香港隊要輸就要輸足五比○，亞洲足協講到明，若然有咁嘅情況，一定要調查兼上訴！
死嘞，咁點算好呢？香港若然贏咗祖國，港人以後北上，實俾人喝打；之不過若然要放夠五粒咁多，可惜人大常委會又管唔到國際足協咁遠，否則一聲「釋法」，由蕭蔚雲邵天任落場做球證，咁就乜事都冇囉！
所以，香港隊惟有要學章小蕙喺楊凡套《桃色》咁，上陣打足真軍喇！不過，唔驚喎！天佑香港，喺中港足球大戰前夕，香港人獲得一個天大喜訊，就係我哋敬愛嘅領導人霍英東之令孫霍啟剛，今次真係confirm實咗，成功將中國女跳水奧運國寶郭晶晶𠝹到手，有傳媒刊登郭晶晶頸上有咖喱雞嘅相為證㗎！
繼高齡財政司司長松松生擒伏明霞之後，又輪到啟剛活捉郭晶晶，香港人喺體育方面，雙喜臨門，有啟剛同香港攞咗頭彩，今日場波，香港隊點會唔贏？一定狂數中國呀！
至於田亮方面，亦親口證實，郭晶晶經已過檔咗畀啟剛嘞！唔使灰心喎，小田！正所謂人不為己，天誅地滅，愛錢梗係緊要過愛國，晶晶今次嘅人生抉擇，係完全正確！
而田亮都唔執輸，簽咗畀本港某大電影公司，準備拍戲㖭！話唔定會喺康城攞埋最佳男主角獎，到時再激死郭晶晶都未遲，到時富婆爭相照顧，邊個最有錢言之尚早呀。
中國政府一度向香港新聞自由挑釁，竟然指使新華社，借晶晶把口，公然講大話，話受𠝹啟剛，「根本冇咁嘅事」，又話香港啲新聞自由好恐怖㖭！新華社唔出聲，民間都重有兩分懷疑「剛晶搭」係咪有吹水成份，直到新華社出聲「否認」，有「天安門冇死過一個人」嘅袁木前科，全世界反而會肯定此事係堅嘢㖭！
果然，現時真相大白嘞！霍英東唔止個仔娶港姐，兩個乖孫，一個𠝹到章子怡，一個就搞掂郭晶晶，同香港人爭盡面子！
咁好意頭，亞洲外圍賽，香港隊今日點會輸波？祝香港隊進軍世界盃成功！
傳真︰2623-9278
電郵︰