外號「藍領蘇甘保」嘅熱刺中堅李察士，認真唔好彩，事關佢有可能俾球員第一號殺手腦癌睇中。
因傷而冇比賽六個月嘅李察士，日前被照到個腦有陰影，初步懷疑係腫瘤，即係俗稱嘅腦癌。如果我求大俠冇記錯，腦癌係球員嘅第一號殺手，好似啱啱過身嘅利物浦名宿E曉士，就係俾腦癌攞咗條命；而丹麥中場韋福特同埋德國前鋒靴歷治都試過患腦癌，但佢哋就比較好彩，醫得番好。
雖然，冇證據顯示頂頭槌同腦癌有關，但頂波姿勢唔正確，對條頸同個腦會有唔好嘅影響。但話時話，𠵱家啲足球員比以前嘅就幸福得多，事關𠵱家啲波係經過特別設計，令球員可以將球技發揮得淋漓盡致之餘，亦可以減低對佢哋身體造成嘅傷害。
李察士𠵱家先至三十歲，萬一佢真係咁唔好彩患腦癌，我求大俠希望佢可以積極面對，同埋努力同病魔搏鬥。
我求大俠喺度要恭喜效力巴塞隆拿嘅瑞典前鋒拿臣，事關佢繼九八年後，再當選瑞典足球先生。雖則拿臣成三十三歲人，但因為生活正常，甚少夜蒲，所以個身體Keep得好好，難怪巴塞啲軍醫都話好多後生仔都唔及得佢啦！照咁睇，佢明夏約滿巴塞後，應該有機會留多一年。
利物浦球迷等咗兩個月，終於等到隊長謝拉特復出嘞！因跖骨骨折而自九月二十號再冇比賽嘅謝拉特，喺前日贏狼隊一比○嘅預備組賽事打足九十分鐘，賽後亦冇不良反應，應可喺周六英超聯替紅軍出征米杜士堡。利物浦有謝拉特壓陣，對喺英超聯和歐冠盃爭取佳績都好有幫助。
搞到兩個龍門簡尼同列文嘅不和變得表面化後，自己擺闊佬懶理款，反而搵龍門訓練員高普基出面調停，唔怪得名宿路明尼加鬧佢搞風搞雨。係人都知奇連士文想大改革，將德軍年輕化，上咗年紀列文根本唔係佢杯茶，只會想借對方踢走另一個老坑簡尼啫，遲早咪用希迪布蘭。
皮利斯就着咗「美洲獅」嘅衫出席法國國家隊活動，正式同國家隊嘅贊助商「三間」道歉，但堅決唔肯就批評法國教練杜明尼治講對唔住。咁又係，佢就算同杜明尼治講「鎖你」，都九成冇機會返國家隊，不過第日約滿「美洲獅」後或有機會同「三間」合作。佢係聰明仔梗識Do啦！