任天堂喺12月2日推出嘅新手提機NDS，香港大部份舖頭仍未敢定價，同日跟機推出嘅遊戲暫定有《孖寶64》、《比卡超》、《TOUCHWARIO》、《孖寶賽車》等重量級大作。據日本消息，定價15,000日圓嘅主機，要超過正常價先有貨批出嚟，加上近排日圓重升到冇譜，到港相信要$1,800至$2,100左右先有交易。而比日本先推出NDS嘅美國版，會送多隻《銀河戰士》試玩版，而美版NDS又冇區碼限制，相信會比日版搶手得多。
至於挑戰者PSP，連日本都未知出貨量，不過肯定嘅係主機會有區碼鎖，要玩外國Game分分鐘要買多部PSP！雖然同期推出嘅遊戲唔太吸引，但以SONY行銷策略睇，鐵人估計日本定價19,800日圓，淨機到港起碼賣到$2,800，如果冇心水Game急住玩，齋用嚟聽MP3都咪話唔奢侈。
呢期美版《GTASANANDREAS》橫掃Game界，隻Game炒到上600蚊都重有價有市，同期PS2嘅《NEO魂斗羅》、《ArcTheLAD》、《SHINNINGTEAR》等，就不幸成為犧牲品，交投十分淡靜，有興趣買不妨同舖頭講吓價，分分鐘有筍價都未定。同Game唔同命，雖然冇之前《旋轉WARIO》咁Hit，不過亦賣得好好嘅GBA《ZELDA》，話晒都係GBA上首款原創新作，市價賣$290左右。
近排大家行開Game場，或者會發覺大量XBOX宣傳廣告，亦有唔少Promotion妹妹仔喺Game舖幫手宣傳。隻《HALO2》已經見街，加上上星期嘅《DOAU》日本限定版主機炒到$2,800都有人追捧，睇到XBOX今個月真係搶番唔少客仔，睇番行情好多網上討論區亦多咗好多XBOX嘅話題。無他嘅，最大賣點嘅本土上網對戰真係只有佢做到，話唔定因此而「發圍兼起啤」都未定。
