日韓興啲乜：<br>睇佢唔出韓國卡拉OK

日韓興啲乜：
睇佢唔出韓國卡拉OK

去韓國，食人參、泡菜、韓燒、汽鍋雞，再去埋汗蒸幕焗桑拿、去東大門同明洞Shopping，十個團十個都係以上行程，有咩新意？有！其實你可以去唱K喎，事關韓國K場設備一流，重有中英文歌唱㖭，「乜我去到韓國唔覺有卡拉OK嘅？」梗係啦，因為佢哋個樣同香港啲K場好唔同，你經過咗都唔知呀！

記者：張銘恩　攝影：陳陶鈞

■經過門口，一眼望晒房內人唱歌情況，最啱有強烈表演慾的人。

韓人唱K齋唱歌！
韓國完全無KLunch、KBuffet、唱K劈酒呢幾回事！佢哋唱K就真係只會唱歌，通常唱一兩粒鐘就散Band，純粹為唱而唱，K場極其量只會提供零食汽水畀客人過吓口癮，所以大家咪諗住可以唱足一晚兼飲飽食醉。不過咁，今日介紹的兩間「秀'sMusic」有免費雪糕任食唔嬲，肚餓可以頂住肚先！

日頭似餐廳！

■環迴立體聲大喇叭加開雙40吋Plasma大螢幕，勁有開個唱Feel！認真豪！

■只提供罐裝飲品，賣港幣十蚊左右，同便利店售價差不多，算幾抵。

■香滑雪糕無限量免費供應，有呍呢拿、士多啤梨等三至四隻大路口味任揀！

■韓國人唱歌唱得零舍有Feel，每間K房備有打拍子的小樂器，好似返咗幼稚園咁。

豪裝K場3類皇宮式靚房
「秀'sMusic」係韓國大型卡拉OK集團，位於弘大入口站附近的「Luxury秀'sMusic」是集團旗下最豪的一間，外面以白和金色為主調，加上兩大排落地玻璃窗，齋睇個Look已經覺得好掂！難得入內也沒有令人失望，由裝修、設備以至服務都無得頂。全間卡拉OK有40間房，分「Noblesse」、「Luxury」及「Season」3種類型，各有特色不過間間都咁豪，侍應均穿整齊西裝，服務一流，唔知重以為入咗皇宮。

體貼設備逐樣睇
K場重有啲你估佢唔到嘅體貼裝置，由門口等位唱K到埋單鬆人全程照顧周到，嚟到唔試吓對唔住自己。

■「Noblesse」貴族大房可容納10多人，矮地台、豪華半圓形梳化、金碧輝煌雕塑像，唱K幻想自己登緊台。

■「Season」類型啤啤熊房，唔算勁豪裝，不過就好Warm，細細間啱三五知己一齊玩，梳化設置於地台之下，咁嘅K房設計香港未見過。

■「Luxury」即外面望到的一系列落地玻璃房，Size細細情侶GoodFit，拉埋窗簾得，拉開窗簾同路人晒幸福亦得。

弘大入口「Luxury秀'sMusic」
地址：漢城麻浦區西橋路367-39號
電話：（82）2-322-3111
收費：6:00pm前每小時每位10,000韓圜起（約$70），6:00pm後每小時20,000韓圜起（約$140）。
交通：地鐵2號線到弘大入口站下車，出西橋路，於Mr.Pizza前路口右轉，直行10分鐘直達。

型人K場明星蒲點
狎鷗亭「秀'sMusic」無咁豪裝，外表重有啲似九龍塘時鐘酒店，不過反而多韓星去，點解？因為狎鷗亭一帶乃型人夜蒲點，附近甚多靚吧及Disco，所以不少韓星都會順道上K場唱番兩嘴，有心撞星一定要嚟呢間！

梘液？錯！係漱口水呀，只需用右邊的即棄小紙杯裝住就啷得口㗎喇。

天寒地凍等位，門口特別安裝數部暖風機，認真體貼。

K房有無線電話，唔似香港K場咁，成日要夾住條電話線企喺房門外煲粥咁麻煩。

■外面睇一啲都唔似K場，男編輯重話有啲似黃色架步喎！

■裝修無咁Grand，但同樣有2部電視畀你唱，而且幾有HomeFeel，價錢相對地平，吸引到不少中學生來大展歌喉。

狎鷗亭「秀'sMusic」
地點：漢城江南區新沙洞659-12號
電話：（82）2-518-9334
收費：6:00pm前每小時10,000韓圜起（約$70），6:00pm後每小時15,000韓圜起（約$105）。
交通：乘地鐵3號線至狎鷗亭站落車，乘的士10分鐘直達（約2,000韓圜，約$14）。

■入口走廊盡頭一座白色三角琴，鍾意可以露兩手，而整條走廊掛滿明星簽名照片。

■張娜拉