飛龍在天之後，就係亢龍有悔。港股連續兩個交易日裂口上升，氣勢如虹，大有一舉攻下萬四大關之勢，但股市升得多、升得急，自然就要調整。隔晚外圍冇事之下，港股低開，已覺唔妥，點知午後跌幅擴大，恒指急挫186點收市，報13746，成交238億元，沽壓唔輕。
昨早按計劃買入燕化（325）同聯洲（048），前者暫以2.95元作止蝕，後者以跌穿1.65元計數。富豪（078）表示無意發行可換股債券來為其澳門項目融資，市場嘅反應係沽之哉，趙飛雲亦跟住出貨；同系之百利保（617）沽得稍遲，沽唔到靚價。始終覺得此系股不甘寂寞，等佢跌定，吼位再炒過。
剛剛講過，中移動（941）同和黃（013）要搵機會食胡。昨早覺得大市唔妥，故先沽中移動；和黃見佢勢強，諗住揸多陣，結果下晝都係要沽。滙控（005）係長線投資，仍然揸住，市傳滙控有意洽購美國百貨公司信用卡業務，涉資30億美元，照計應該係好事。
大市雖然回得稍急，暫時仍以調整市視之，相信恒指回到10日線（目前在13609）已有支持，屆時可買Call輪短炒。趙飛雲比較鍾意玩恒指Call輪，暫定對象係4478，昨收16.2仙，明年3月尾到期，溢價2.6%，槓桿率19.7倍，交投都幾活躍。
趙飛雲