環境運輸及工務局早前公布咗十二個保育地點清單，涉及九百六十九公頃新界土地，成班新界人士火都嚟埋，正如鄉議局主席劉皇發噚日喺鄉議局例會上講：「九百幾公頃都唔少錢，一百蚊一呎，即係新界人嘅荷包，有百幾億郁唔到！」
鄉議局執委文富穩有另一番道理，話政府一邊猛咁填海破壞環境，另一邊卻以保育為由凍結新界土地，即係雙重標準。
多位議員愈講愈㷫，話政府官迫民反，有人真情流露猛爆粗，亦有議員主張學長毛咁同政府抗爭，話唔理政府，一於照發展，唔信政府敢入鄉拆屋。發叔勸住大家，話先去信廖秀冬，叫佢喺十二月前到鄉議局解釋政策，唔嚟的話，就會同張學明、林偉強、李國英、黃容根、李鳳英幾位鄉事背景立法會議員下月二號約見特首時，當面投訴。
講來講去，都係錢字作怪，鄉議局不滿政府搞環保卻一毛不拔，希望政府出錢向佢哋買地或租地，就皆大歡喜，唔知政府捨唔捨得呢？
傳真︰2623-9278
電郵︰