《蘋果》於十一月十五日頭版大篇幅報道渣打銀行（香港）執行董事兼行政總裁王冬勝辭職，震動賓架界，人人爭住打聽消息。當日上午九點後，金管局負責監管銀行嗰位洋人已經出聲話渣打會於十一月十五日下午發表聲明，佢又加多一句，王冬勝另找工作冇困難，即係話《蘋果》消息好堅啦。
王冬勝出身於花旗（昔日之萬國寶通），擅長個人銀行業務（即零售、按揭、消費貸款），而渣打集團行政總裁戴維思亦係萬國寶通出身，喺九七年之時，自花旗挖咗王冬勝過去，目的就係搵佢接班，後來兩人果然一齊升，戴維思去英國做CEO，王冬勝就做香港阿頭。以此觀之，兩人應該好拍檔、好夾㗎？何以王冬勝要鬆人？
據唔同賓架嘅傳聞，戴維思要王冬勝提升香港渣打嘅股東資金回報率，去到二十六巴仙，王冬勝認為以香港今日之環境，恕難做得到，於是大家意見不合，不甚愉快，其後渣打決定裁員二百人，削減人力成本，王冬勝畢竟係香港仔，出任好多公職，知道香港經濟轉好之際，渣打利潤大升之時，一間發鈔銀行炒人魷魚，一炒就二百件，梗會俾人鬧到開花，特區政府亦會垂詢，故此堅持反對。上頭決定咗，汰舊迎新，舊人薪水高，新人薪水低，一汰一迎，自然慳番唔少，點到你反對呀？吞唔落，重有嘢講？下場可想而知矣。TVB新聞部羅燦夠話交唔到人頭咯，佢咪要辭職，辭完就到手下被炒？
現在班打工一族甚艱難，好多時要自保嘅話，高級打工仔就要交出下層人頭，否則自己人頭不保。下層人士而兼夾年過五十者，隨時成為犧牲品。奉勸大家使少啲錢，勤積蓄，學習投資之道！