港股在14000點大關前爭持，轉向個別發展，國企亦然，近日有強勢表現的金屬股唞氣，石化股果然接力而上，最勁係吉林化工（368），升4.4%，收報2.35元。
10月5日推介過吉化，當時股價1.64元，目標價2.20元；10月27日吉化宣布第3季業績後，將目標價調升到2.40元。噚日，吉化走勢再現突破，目標價有必要再調升。
個多月來，吉化由1.60元急升上2.275元才出現調整，形成上升三角形，噚日破位而上，且成交大增，確認新升浪再開展，照度上去，上升目標指向2.85元。
吉化係近期表現較突出的國企，主要原因係有超勁嘅業績支持，而其PE亦係國企中最低嘅。
04年度（12月年結），吉化每季嘅盈利都跳升，第1季賺2.59億元（人民幣．下同），第2季賺3.47億元，第3季重犀利，大賺16.48億元，與去年同期比較，激增14.4倍；首3季合計賺22.53億元，則增長4.47倍。
吉化全年盈利幾多？保守估計，起碼有29億元，每股盈利0.81元（折0.767港元），現價PE僅3倍，即使升上目標價2.85元，預測PE都只係3.7倍！
季度報告中有一句，就係「力爭04年全年實現利潤較03年增加550%左右」，即係約莫27.75億元。不過，中期報告時，吉化亦話到明，「今年首3季利潤較去年同期可增200%至250%」，結果開出嚟係一個double，增547%。若季度報告同樣係咁保守，則吉化全年盈利30多億元亦唔奇，PE更低。
恒指噚日收13746，跌186點。過去兩個交易日，大市出現咗兩個上升裂口，一個係13685至13747，一個係13822至13888，噚日恒指最低13726，已完全補回第2個上升裂口，而第一個亦補回部份。噚日調整幅度雖然較深，但在14000關前回頭，早係意料中事，整固完成後，有力再衝關而上。
銀建（171）高成4.275元後回收4.075元，跌7.5仙；遠東發展（035）高價3.475元，平收3.325元；中信21世紀（241）高價2.775元，收2.65元，跌1個位；3股只係調整，未升完，可趁機會低吸。
郭兆誠