恒指散番186點，滙控（005）跌2.5元，拖低恒指90點。滙控跌，係因為美國Household第3季業績倒退。滙控前日上到136.50元，9RSI高達88.7，昨日回吐後9RSI落番68.0，唔再超買，遲吓啲人又會諗吓，歐元上升，對滙控歐洲盈利折算番港紙有利，股價又有機會升番。
滙控C輪：博正股重納升軌，揀C輪，正路之選係4441。4441前日升13仙，昨日跌19仙，兩日計埋跌突6仙，收0.93元，隻輪明年6月到期，負溢價0.6%，槓桿率14.4倍（有效10.4倍），引伸波幅13.1%。計埋正股除息因素，有7個幾月壽命，賭得過。
4445亦係正路之選，隻輪前日升14仙，昨日跌21仙，兩日計埋跌跌突7仙，收76仙。博反彈亦可揀呢件。隻輪明年6月到期，負溢價0.3%，槓桿率17.6倍（有效11.7倍），引伸波幅13.22%。
中電信C輪：中電信（728）收2.725元，跌10仙或3.5%，跌幅大過晒其他電訊股。中電信跌得落去彈得番上嚟，揀C輪博反彈可也。
主角係4577，收33仙，單日散18%。隻輪明年6月夠鐘，溢價9.4%，槓桿率8.3倍（有效4.7倍），引伸波幅37.8%。
想溢價低啲，則揀4499，當然溢價低則槓桿率亦低啲，爆炸力與殺傷力亦低啲。
長實C輪：和黃（013）早段好實淨，連帶長實（001）亦係。埋單計，和黃跌50仙，長實則跌夠1元。長實C輪可趁低撈貨博反彈，主角係2249，配角係2258。
章盛