渣打王冬勝突然劈炮，消息轟動中環，有人話佢因為不滿公司大幅炒人所以不幹，又有人話渣打想郁佢好耐，點都好，上星期同佢見過面傾裁員嘅民主黨鄭家富就話有迹可尋。
第一，鄭家富一直都有就大公司裁員約見高層，但係對方一定推三推四唔肯見，但係今次約王冬勝好順利，差唔多一約就掂，即是好似老董咁，剩番兩年撈，其言也善，乜都順攤啲。第二，見面當日，王強烈暗示佢都無能為力，希望啲請願相及有關新聞，英國宗主國方面睇到，收回成命，當時佢已表現得好惆悵，原來幾年前總公司都叫過佢炒本地員工六百人，即係迫佢做漢奸，當時佢頂住，只係炒咗一啲。第三，見面完結，王重承諾一定會盡力調配人手，減低影響。呢啲說話好似好少有高層肯講。諗番轉頭，佢老哥係去意已決講少少肺腑之言，話之佢英國佬唔啱聽。今次壯烈犧牲，都算堅持民族尊嚴咯。
傳真︰2623-9278
電郵︰