特許經營方式運作嘅代理行世紀21，逐漸成為行內第三勢力，其中世紀21富山，剛成功簽約，租用房委會樂富商場舖位開分行，成為呢個商場唯一代理舖。
世紀21富山董事柯興捷話，足足傾咗半年，房委會至應承。舖位六百呎，租金租期不便透露，但比房委會原先開列租值高兩成。
房委會商場與停車場，下個月會以地產信託基金形式分拆上市，未來經營方式同私人機構無異，估唔到𠵱家已經提早咁做，實行「價高者得」，睇嚟第日都會作風大變。唔知係咪會加強基金上市嘅吸引力呢？
代理行承租能力，係各行業中數一數二，若能喺公屋區落腳，有助物色換樓客。第日代理行搶房委會商場舖在所難免。蘭西記得，將軍澳尚德村商場，都有間世紀21獨市代理舖。
恒基西灣河嘉亨灣，今年八月份開賣前，宣傳活動鋪天蓋地，蘭西印象較深嘅，有十二國語言樓書、大型代理誓師、直升機宣傳橫額等等，務求令到人人都識得呢個盤。
咁落力宣傳，除咗個盤當日賣得唔錯，收到預期成效之餘，重獲得香港市務學會欣賞。該會較早時邀請發展商同埋負責公關推廣活動嘅恒信公關，出席研討會，向香港市務學會會員，講解吓嘉亨灣嘅市場策略，同埋樓市發展。樓盤宣傳都可以變做教材。
恒基營業部助理總經理林達民負責講解，重用埋「4P」市場學概念，即係產品、銷售渠道、定價同推廣活動。如此專業，真係唔講得笑。
太古地產喺內地嘅地產旗艦發展項目，廣州天河「太古匯」，噚日正式攞到土地使用權，即係可以發展嘞。太古地產董事及總經理安格里話，呢個會係集團旗下嘅第四代物業發展項目。
太古喺呢個項目嘅股權，已增至九成七，其餘由《廣州日報》持有。
項目可建總樓面逾四百萬呎，包括商場、寫字樓、酒店及文化中心，二○○八年落成，總投資逾四十億元人民幣。
政府不時俾人鬧，將啲市區靚地起公屋，浪費公帑。但係噚日有消息人士話，房委會未來嘅原則，係將啲市區貴重地皮，交番畀政府，賣畀發展商，獲得嘅收入，房委會唔會分帳，認真順應民意。
房委會下季，公布五年發展計劃嘅時候，就會決定邊啲地會畀番政府。現時已拆卸嘅市區公屋地皮，都好大機會交番出嚟，至於幾時賣，就由政府決定。
地產市道好景，入行人數大增，截至十月份，持牌代理近萬八名，較一月增加兩成二。
美聯物業話，集團本地前線員工有近二千七百人，比一月增加兩成半，佔全港持牌代理總數約一成半。集團未來兩個月，都會繼續增聘人手。
另外，中原地產表示，現有前線員工二千七百五十名，較一月多近三成，今年內會再請多二百人。
合和荃灣悅來酒店商場翻新及重新包裝，令租金升兩至四成，工程明年二三月完成。
個商場新名悅來坊，前身係百貨店，二十二萬呎，間為近百個舖位，係睇準荃灣區有多個新盤陸續落成，區內有年輕新力軍進駐，商場要變得生活化，提供多啲食肆、娛樂場所及家居用品店等。
中記代理招租，每呎十五至五十蚊，平均三十蚊，每月可袋六百萬。初步有機舖預租地庫，超過萬八呎，成為最大租戶。
電郵地址：
