電盈技工坐的士，畀八折車費，以的士車費收據向公司申領公幹出差嘅車費，賺取差額。呢條橋好似天衣無縫，照計坐八折的士，已經蔚然成風，攞番收據，理所當然，點解會俾電盈拆穿西洋鏡，報警拉人㗎？𠵱家的士司機被判監十一個月，三個技工分別入獄十一個月與八個月。既有此案例，以後大家搭的士，申領番公數嘅，唔該以此為鑑。
左丁山從不主動傳呼八折的士，收到司機卡片，亦丟落垃圾桶。但八折的士實在太多，點都會碰到一兩部嘅。食家L就袋住晒啲八折的士卡片，臨食完飯就call定，五分鐘內到，確實十分方便，佢叫左丁山同佢一齊走，上的士鬆人。試過幾次，唔同嘅的士司機沿途不斷講電話，好似生意好好噃，一陣話八分鐘到寶馬山，一陣又叫孖五孖××五分鐘去到又一居，跟住又叫孖三孖YY十分鐘到藍田，一邊收人客柯打，一邊叫同群去接客，十分忙碌，證明呢條八折收費橋，好收得。
從經濟分析，你話過海的士喺鷹君中心對面排長龍，起碼半個鐘頭至接到一個客過海好吖，還是加入八折黨接call好呢？司機應該識得計數，照情況睇，八折黨如果接客順利，一個接一個，慳番唔少等候時間，每程收少兩成錢又點話吖。呢個機會成本問題可以成為通識教育嘅考察project，經濟科老師不妨叫學生研究吓。邊境走私本質上係一個稅務問題，唔係故意犯罪問題，同樣道理，的士八折收費係一個市場（乘客與的士）嘅供求問題，證明的士市價（收費）高於市場需要。廖秀冬去年講交通費用可加可減，但係唔敢推動的士減價，只係出口術叫巴士地鐵減價，直情係笑話。