共產黨有大把宣傳機器，上海姑爺羅康瑞唔知係咪嫌黨中央嘅宣傳機器冇乜效，所以佢以今年係中國開放改革二十五年；同埋鄧小平誕生一百周年為借口，同《文匯報》以及中國外文出版局一齊，整咗本幾十磅重，厚過本百科全書嘅大型畫冊，叫做《中國改革開放的故事》，寄晒畀八百個選委，擺明車馬話，出呢本精品就係想「為國家盡綿力」，以中英文向海外宣傳中國呢段重要嘅歷史，幫中國建立個好嘅聲譽。
羅康瑞聲稱，好多外國人唔了解同唔認識中國，對中國又有「偏見」，所以佢邀請咗好多國際著名嘅企業家同學者做顧問，又請滙豐大班龐約翰幫本書寫咗幾句，大讚中國將會成為全球最大嘅經濟體系，中國人最鍾意聽鬼佬讚，此書一定不會令維園阿伯失望。
呢本精品，好似八九年嘅六四就梗係一字不提，反而上海新天地就有專文吹捧，冇辦法啦，本書係羅康瑞出錢印嘅嘛，梗係就住中國阿爺心意，不過呢個時候瞓身表演，可能佢想選第三屆特首啦。
傳真︰2623-9278
電郵︰