若要揀商廈炒盤之王，金鐘力寶中心肯定當之無愧，今年商廈市道好番啲，力寶就已經炒到飛起。最近有個單位，造價一個月勁升近兩成，幅度驚人。
一座二十樓五室，千五呎，剛以逾一千零四十萬沽出，每呎六千八。賣方十月初以八百八十萬買入，話咁快就有客肯承接，執成百六萬，件貨升值一成八。
至於二座三十四樓二室，二千一呎，以近千六萬易手，每呎七千四。賣方都係上個月至用一千四百幾萬買入，一個月賺一百二十六萬，幅度八點八巴仙。
聽講，呢個買家即刻放售件貨，叫價每呎八千以上，即係話至少要賺八巴仙以上，認真夠膽識。
中記何紹榮指出，投資者搜羅優質商廈，預料力寶呎價可以續創新高，平均有力升破九千大關，海景單位則挑戰一萬蚊一呎。
好耐都冇新樓賣嘅麗新發展，近排開賣尖沙嘴金巴利道二十六號。雖然係單幢樓，規模唔算大，但甫推出，好快賣咗大部份，𠵱家剩番十八個一手單位。
香港置業何偉航話，呢個盤剛錄得第一宗二手成交，中層C室四百零九呎，原業主上個月用二百六十萬買入，不足一個月，以二百九十萬賣出，每呎七千零九十蚊，賺三十萬。
呢個盤喺正尖沙嘴旺區，購物消閒都咁方便，唔少投資者原本諗住買嚟收租，但個別見有錢賺，就即刻套現離場。
內地樓盤喺促銷方面都幾多新招，好似上月底，駿豪集團推出深圳觀瀾湖「假日·賽維納」咁，副主席王羅桂華話，規定買家一次要買五伙。
原來呢招都收得，已經賣咗五十伙，套現四千萬。佢哋重考慮提高售價。
「假日‧賽維納」單位六百三十八至七百零六呎，駿豪提供兩種租金回報保證，扣除管理費及租金收入稅後，回報率約七點三及八點一三厘。
另外，和黃廣州番禺珊瑚灣畔，除咗搵奧運金牌健兒協助宣傳，重安排私人專用包機，接載水岸複式洋房買家，嚟香港簽約，名額八個，夠晒噱頭。和黃話，水岸複式洋房，上個禮拜六已經公開發售。
樓價狂升，銀紙購買力大不如前，一年前用一千萬可以買到半山豪宅，𠵱家原來只可以買個屋邨住宅單位。
北角城市花園（圖五）十一座極高層C室，面積一千三百八十呎，由外籍客斥一千萬元承接，每呎七千二，創九八年以嚟新高。屋邨樓都要成千萬一間，係咪估唔到呢？
利記顧偉瀚話，呢單交易，造價較市價至少高一成半，估計係因為賣方今年八月，用咗近七十萬，將單位大事裝修，加埋有靚海景，買家咪貴啲都肯制囉。
電郵地址：
