阿積士成名球星早熟早殘？
球驗客手記：簡奴、古華特失機頻頻

喺星期日兩場直播嘅英超聯賽事，本報推介中正波膽，固然令人開心，不過睇到西布朗前鋒簡奴同埋紐卡素前鋒古華特呢兩位成名於荷甲聯球隊阿積士嘅球員嘅表現，就令我求大俠有啲欷歔。
喺西布朗主場迎戰米杜士堡場波，西布朗本來有大好機會追和二比二，為新領隊白賴仁笠臣首場領軍帶嚟好開始；點知簡奴竟然喺臨完場前離門唔夠一碼打飛機，球隊最後輸一比二。賽後白賴仁笠臣同埋米杜士堡嘅領隊麥卡倫都異口同聲咁話，唔明簡奴點可以射唔入。如果簡奴再唔表現好啲，睇嚟佢個西布朗隊長位都唔係做得好耐。
至於紐卡素嘅古華特喺對曼聯場波亦失機頻頻，結果六十幾分鐘就被換出。唉！當年簡奴同埋古華特一齊喺阿積士成名，表現都唔知幾好，不過之後就齊齊無以為繼，唔通阿積士球員始終逃唔過早熟早殘嘅厄運？

梅度患難見真情羅國收容風雨同路
前車路士前鋒梅度因服用可卡因而被罰停賽七個月，不過羅馬尼亞足總就畀佢跟國家隊操練，重喺星期日齊齊出發，備戰星期三對阿美尼亞嘅世盃外圍賽。羅馬尼亞前鋒巴拉圖重話：「梅度係國家隊隊長，有佢同我哋一齊，士氣都好啲。」羅馬尼亞國家隊真係有情有義！

意大利盡用新丁大會國腳樂得清閒
話晒係今年最後一輪國際賽，各教練點兵都冇話太弱，惟獨意大利嘅納比盡選新人鬥芬蘭，包括基連尼、柏利斯、卡拉斯奧路、巴沙利等，連摩納哥龍門羅馬都有份，夠騎呢，鹹魚翻生嘅蒙迪拿已算最出名嗰個。納比冇選AC球員，國米同祖記亦各得一丁，大球會錫晒你。

兩場大戰打到氣咳紐記下半場投降
紐卡素前日輸畀曼聯都可以講輸自己，成班「紐記」球員下半場好似無晒氣咁，中場球員行住嚟踢。無他嘅，上周中聯賽盃對車路士又強陣爭盃踢到加時先輸，休息三日後對住備戰成個星期嘅紅魔，結果淨係朗尼一個後生仔踢快放就已經贏晒，「紐記」可謂雙重損失。

朗拿度收身有火對巴塞弗得合時
朗拿度婚禮明年一月先舉行，但我求大俠睇完佢對阿爾巴塞特表現，收身情況相當理想，好似瘦身廣告代言人一樣，減肥前後兩個身形。其實，最重要係佢比賽最後十分鐘嗰種拼搏態度，過關斬將爭士哥，真係好少見；如果佢同施丹嚟緊對巴塞隆拿時都咁弗，呢場大戰引頸以待！