由黑白走進彩色，乃理所當然之事，就如當年電視機由黑白進入彩色年代一樣，無論係電腦顯示器、手提電話、PDA等，都係由黑白的世界走出來。但係彩色世界原來亦毫不簡單，淨係講顯示器物料，已經足以影響一個彩芒的表現能力。
文：手機人
單喺手機世界之中，TFT、STN、OLED、TFD等一大堆名詞，已經睇到頭又暈眼又花。其實依靚芒排名榜計，首選就係OLED，依次就係TFT、TFD、CSTN、STN。
由於OLED（OrganicLightEmittingDisplay）最特別就係可自行發光，毋須加裝Backlight，直接令到厚度大大減薄，兼且光度及對比度亦都係所有顯示器之中最高，最重要係耗電量低，缺點係價錢貴、壽命短、技術上未成熟等因素，所以多數廠商都只係採用單色OLED，暫時只得三星嘅V5400採用多色OLED。
而後一檔嘅TFT（ThinFilmTransistor），就係現時最多手機及Notebook採用嘅顯示技術，由光亮度、對比度及反應都屬中上表現，不過由於耗電量高，所以令手機備用時間直接縮短，而且成本亦較高，所以令TFD、CSTN及STN等顯示器亦有生存空間。而TFD就屬於TFT與CSTN/STN之間的級別，其功效與TFT類似，不過就較TFT慳電，所以亦受廠商歡迎。最後CSTN及STN都屬於較早開發嘅顯示器，對比於TFT及TFD，反應較慢，易出現殘影及波浪紋，所以大多應用於低階手機。
最後一提，睇靚芒除咗睇顯示器材料之外，解像度亦一樣重要，直接影響畫質的細微度。目前一般手機以320×240像素為最高，不過解像度同價錢直接掛鈎，所以要買具有320×240像素，甚至更高解像度嘅手機，價錢就會較高。
《吹吹IT風》以討論及分析熱門IT話題為主，由電腦、數碼相機、手機、AV產品到TVGames，都屬討論範圍，歡迎讀者提出改善建議、討論話題、疑難雜症，谷氣投訴甚至自薦發表文章都得，總之大家多多交流。