恒指又升147點，滙控（005）升2元，「居功」72點。C輪多，變化步伐唔一致。揀啲移動得慢嘅埋手，贏面大。昨日所講，和黃C輪2157上周五彈升33%，意味正股會郁，結果上周五落後嘅2273與9132，昨日跑得勁快。咁樣揀輪，當然要認為正股會去。正股唔去，落後輪一樣唔升得。
國壽C輪：用上便講嘅理論，國壽C輪4492炒得過。國壽（2628）最高都係5.75元，亦係收5.75元，升1格。主角C輪2143最高曾見65仙，升20%（11仙），又係好似上周五和黃C輪2157咁，突晒章，埋單價61仙，升13%（7仙），仍然突章，總成交229球，成交金額1.31億元，最大係佢，又可以代表國壽有得睇。
主角2143突章，望吓配角4492，隻輪明年3月到期，輪價49.5仙，溢價5.1%，槓桿率11.6倍（有效6.9倍），引伸波幅31.6%，最高價52仙，埋單升得1.5仙，唔夠。2143帶住，正股個勢又有料，炒4492，好快可食雞鮑翅。
電盈C輪：個市勁，電盈（008）有啲爛泥味，收4.825元，除息計實跌2仙。趁低買主角C輪9814。
正股係有啲爛泥味，不過要咁睇，恒指直撲萬四，距離52周高位14053只相差121點，電盈則距52周高位6.60元相差幾乎兩蚊。個市繼續去，電盈遲早都會跟多少上番去，所謂追落後是也。
9814明年1月到期，輪價17.8仙，溢價7.1%，槓桿率27.1倍（有效11.4倍），引伸波幅30.8%。長期輪，則揀4664，但交投太薄，搵嚟炒，都係9814着數。
章盛