港股向14000大關推進，恒指噚日高見13951，收13932，升147點，成交好暢旺，有228億元。
大市今次由13000抽上成1000點，令淡友措手不及；大戶既然做得出咁震撼人心嘅上半場（淨係二三線股嘅升勢，已令到散戶如癡如醉），則下半場（14000之上）嘅升勢應該會更轟動。不過，恒指14000大關照計會停一停，消化一吓，然後再升過。
上月底，銀建國際（171）才2.80元，噚日已衝破4元大關，高收4.15元，升8.5%，且有大成交配合而突破旗形阻力，照度上去，下步目標指向4.70元。
銀建自獲花旗入股後，股價表現脫胎換骨，聽聞短期內續會有好消息，花旗入得股，進一步合作自係順理成章的事，早前的一個「包」（569億元的不良資產），好大可能係雙方合作的開始，而之後更大型、涉及千億元計的注資，花旗肯定會擔當更重要角色。
遠東發展（035）走勢亦突破三角形阻力，高成3.40元後，回收3.325元，升3.9%，創出今浪新高。不過，美中不足係昨日嘅成交未配合，唔排除在3.40元水平要整固兩三日，才向量度上升目標4.50元推進。
上月中推介過華瀚生物製藥（587）（當時股價0.89元），早幾日曾升上1.04元，噚日收0.97元，成交則由上周三的8600多萬股，縮到只得460萬股，旗形整固應已接近完成，升破1元阻力，初步上升目標指向1.20元。
成交大增之日，有消息話基金落叠，噚日終於證實「金手指」ValuePartners揸咗4300萬股（佔發行股數6.8%），場內平均價約0.84元。基金上得車，自有一番盤算，華瀚日後表現應會令人刮目相看。
對上年度（04年6月年結），華瀚營業額5.07億元，升131.5%，盈利9500萬元，升10.6%，每股盈利15仙，往績PE只係6.4倍。
集團早前收購貴陽德昌祥藥業8成股權，現年度可提供貢獻，加上本身業務增長，估計盈利可達1.4億元，每股盈利24仙，以仍屬偏低的6倍PE計，股價已可升上1.44元水平。
郭兆誠