馮仁昭四圍超：
華仔拖朱麗倩遊涉谷解防線

劉德華入行咁耐可以話冇乜緋聞，咁多年嚟傳來傳去，只有話佢同大馬靚女朱麗倩結咗婚，重有一個女㖭！不過問親華仔都係例牌否認，佢對自己嘅感情事的確顯得好避忌。

未曾公開合照
事實上華仔又係相當厲害嘅，啲狗仔隊影過無數次朱麗倩帶住個細路女喺華仔屋企出出入入，但咁耐都影唔到佢兩個一齊嘅合照！
不過噚日有人打長途電話畀馮仁昭報料，話喺日本嘅涉谷撞見華仔、朱麗倩同幾個朋友一齊度假，去到外地，華仔嘅防線可能比較鬆懈，所以俾人見到佢哋一齊亦冇乜大反應！講真，華仔事業發展得咁穩定，啲fans又對佢咁忠心，點會介意佢有伴侶呢？以佢呢個年紀（四十三歲）公開自己有個伴侶，相信唔會動搖到佢嘅事業！不過可能華仔覺得呢啲係私事，唔使同人交代啩！

刀郎迫阿倫招供
內地歌手刀郎同譚詠麟噚日齊齊到港台接受訪問，又互相交換禮物，刀郎帶咗新疆特色樂器「彈撥爾」畀阿倫，而阿倫就送咗兩頂鴨嘴帽回禮，訪問期間阿倫重大讚刀郎太太端莊賢淑㖭！馮仁昭打蛇隨棍上，即刻問刀郎見過阿倫女友未，刀郎好認真咁話：「冇，但真的有嗎？」阿倫即時招供話：「有，下次介紹你識！」

克勤教女友接招
李克勤噚日接受商台直播訪問，早排譚詠麟踢爆克勤同女友嘅婚事，令佢連日嚟成為傳媒追訪嘅目標，住所樓下重有記者守候㖭，為免影響家人，克勤除咗要施妙計撇甩記者之外，重叮囑女友話：「因為唔知人哋想寫乜嘢，所以千祈唔好着鬆身衫，唔好黑面，要保持笑容！」

韓在石正式入伍受訓
早排被揭發以假病歷嚟逃兵役嘅韓國男星韓在石，噚日下午喺經理人公司工作人員陪同下，去到江原道一個新兵教育隊度報到，已經剃咗頭嘅佢，戴住頂鴨舌帽現身，由於韓在石已經三十一歲，漢城兵務廳安排佢只需要喺新兵教育隊接受四個星期訓練，之後就會去漢城居住地，履行二十六個月嘅兵役，韓在石話會全力以赴，度過呢段軍人生活喎。

S.H.E群犬反轉錄影廠
三人女子組合S.H.E噚日分別帶咗自己嘅寶貝狗，為陶子主持嘅台灣電視節目錄影，幾隻狗仔幾乎反轉錄影廠，不過成員之一嘅Ella就話唔擔心，佢用國語話：「反正本來就會失控。」三位成員重喺現場分享養狗經驗，當正狗仔係自己仔女咁，「母愛」氾濫。