恒指再度裂口上升，高收13932，距年初高位14058近在咫尺。恒指連續兩個交易日裂口上升，其勢極強，但9RSI去到79，回吐壓力漸大，倉內的中移動（941）及和黃（013），開始要留意食胡機會。
首機（694）走勢尚未轉壞，但再次受阻於2.975元，且現十字星，故沽出換馬。昨早按計劃買入駿威（203）和中芯（981），前者暫以2.775元為止蝕位，後者跌穿1.75元計數。
藍籌靚，國企亦有勢，國指昨日升破上月反彈高位4838，收報4913，升82點，目標指向5300-5500。國企這一升浪，由保險股做先鋒，資源股隨後殺上，𠵱家追國企，趙飛雲嘅心水係北京燕化（325），取其相對落後，升勢初起也。
國指已升破上月高位，但燕化現價3元，與上月高位3.325元比較，仍低出近1成，明顯落後，遲早追返上嚟。睇走勢，燕化剛升破10、20同50日線，9RSI重回中軸，MACD有重現雙牛買入訊號之勢，若能突破3元阻力，上升空間不小，短線目標為上月高位3.325元，以中線計，有機重上年初高位3.8元。
另一隻要留意之股份係聯洲國際（048），集團主要收入來自歐洲，歐元強美元弱，對佢十分有利（睇吓思捷（330）就知）。聯洲上周除息後股價調整，落到10日線見支持，昨日突破旗形，意味完成整固，現價買入，中線目標2元。
趙飛雲