立法會辯論由張超雄所提出用公投方式諮詢雙普選，特區政府即時發惡，大罵公投係誤導市民，不切實際，又話係破壞特區及中央關係，破壞社會和諧。
殊不知邊個都有資格反對公投，獨係呢個政府冇資格出聲。要求○七○八年普選特首嘅呼聲從何而來？係由去年五十萬人七一大遊行而來。咁點解搞到五十萬人大遊行？沙士危機處理無能禍港害民、「八萬五」打沉特區經濟、「高科技港」及「中藥基地」無煙大炮，搞到民不聊生，先至官迫民反，政府迫市民遊行。
中方條氣唔順，時時質問：「港英」殖民地時代點解你哋香港人唔嗌普選？好笑喎，點解？因為殖民地啲港督冇個有阿董咁嘅低水準，殖民地政府高瞻遠矚，施政良好，樣樣自動波。一九八三年黑色星期五，全港市民搶購美元，殖民地政府即時決斷七點八港元聯繫滙率，一項老本，中央及董團夥食到今時今日，就係唔敢推翻！
點似得呢個壞鬼政府，一九九七年十月金融風暴，兵臨城下，董團夥重洋洋得意，大嗌冇事，車天吹地，話聖誕節前就會「復甦」！索羅斯將個特區變做自動提款機，將特區經濟一鋪打殘，董團夥重死攬實「八萬五」，大量建屋，與索羅斯裏應外合，進一步打殘樓市！
沙士大瘟疫，董團夥話「不會在社區爆發」，衞生署向廣東省衞生廳索取資料，嗰陣時祖國就唔同你講「血濃於水」，亦唔講「粵港合作」喎，睬你都儍，搞到三百條人命白白葬送，包括香港女兒謝婉雯醫生！
七年劣政，係邊個不切實際，邊個誤導市民，邊個不斷破壞社會和諧？江澤民握手欽點特首，點出個超級爆燈智能兒，第一任衰晒，第二任以為洗牌再嚟過，點知「高官問責制」迅速成為笑話，「執政大聯盟」又瓦解埋，連佢啲頭馬，都話跟佢呃飯食，只有辱，沒有榮，咁嘅政府簡直世間少有，香港人一早睇穿，要求加快直選步伐，天公地道！
點知中方再次大石壓蟹，「四二六釋法」，直選及「功能組別」比例維持各半，政制一步都冇發展，呢一樣經已違反咗《基本法》。五十萬人大遊行，引誘中方出面公然干預特區內政，互不信任，破壞中央及特區關係嘅，除咗董團夥，捨佢其誰？
現時董團夥照例又卸責，好似七年來佢乜都冇錯，只有市民、民主派、長毛、張超雄、六百萬市民先至一錯再錯，特區倒退回二千年前指鹿為馬嘅黑暗世代！
傳真︰2623-9278
電郵︰