資金流入，港股噚日勁升147點，突破13900大關。呢次升市似乎與期指大戶活動有關，買盤集中於滙控（005）及和黃（013）兩大重磅股。恒指自11000反彈至今，在12000及13000心理關口均有整固，相信14000關口亦不例外，但在息口低企、憧憬人民幣升值，以及資金持續流入的情況下，要突破萬四關相信亦不難。
澳門概念股繼續有炒作，宣布發可換股票據還債嘅國新集團（1215），一度炒高54%，國新表示，正進行投資博彩旅遊業的初步洽商。該股昨日收報0.172元，升47%，成交2500萬元。不過，磋商投資5000萬元至1.5億元於澳門酒店、賭場、娛樂及相關業務嘅互聯控股（273）就完全缺乏炒味，股價原地踏步，報收0.27元，成交只得77.79萬元，但已較平時為多。
其實好多澳門概念股只係講吓研究投資澳門就已經炒到飛起，但唔知點解互聯控股講明要投資幾多錢咁具體，股價都無厘反應。黑客話股份能否炒到起，唔單止睇有無概念，重要睇下有無有實力的莊家維持秩序。
蜂林（8156）首季賺1206.3萬元，增59%，成績不俗，股價噚日勁升13.4%至0.93元，成交達432萬元。消息話除咗業績好之好，公司正洽購國內一個銷售網絡兼且會到海外路演，有機會踢高批股。
瑞力（491）每股0.01元配售90億股新股（佔擴大後股本46%），集資9000萬元。股份噚日復牌急升63.636%，e莉莎據聞今次有相當部份落入炒家手，唔知又會否與濠江概念扯上關係呢？
阿虎