多得滙控（005）keep住勁升，同埋澳門賭業概念股狂漲，炒家散戶炒股賺到錢後，終於有閒錢炒二三線股。
經紀陳噚日就品題隻保利達（208），佢話隻股搞緊供股，若果想多啲人參與，股價相信會做番好睇啲，所以可以留意吓。
保利達早排以1供1，每股0.55元，集資3.354億元，其中1.58億元用嚟向大股東收購製冰業務，1.428億元還錢，3110萬元做營運資金。既然集資咁大筆錢，當然愈多股東供股愈好，唔通包銷商想上身乎。
保利達收0.62元，升5.08％，而隻rights（2942）就勁得多，大升56％，收3.9仙，雖然成交股數540萬份，金額只係13.3萬銀，似乎係有人收集嚟供股。
另外，早排證實欲染指濠江生意嘅大華國際（600），最近表現亦實淨好多，噚日最高抽上0.315元，收0.285元，升9.63％。經紀陳話大廚今次進軍濠江唔係得個講字，據聞目標都已經搵到，只欠大筆一揮咁講。
慕容小初