在東京，吃倒是靠得住。隨便在街上找一間迴轉壽司，比方說在新宿鹹碟專門店附近的「元祿迴轉壽司」，油甘魚肥美新鮮，入口化油，腥都唔腥吓，更勝過在香港吃甚麼吞拿魚腩。自家醃製的鯖魚壽司加薑葱同吃，很有吃切雞飯的滋味，普遍在香港吃到的鯖魚大部份已醃成鹹魚，魚肉又嚡又霉，冇得比。兩個人吃個人仰馬翻，每人狂掃十多碟壽司，埋單也不過每人百多元港幣。久聞築地魚市場大名，但親身到該處需要非常神心，晨咁早起身搭神咁長車程。在涉谷看見一間本店在築地的「築地迴轉壽司」，門口排了一條神咁長人龍，店員問明我們是中國人後遞上一張中文的排隊須知：「起碼要吃七碟，可在店內坐二十分鐘，如吃十碟或以上，可坐三十分鐘。」見到咁架勢，以為執到寶，立即排隊。吃完後發覺口味不及「元祿」，但價錢則更便宜，同樣人仰馬翻，但每人唔使一嚿水。
吃日式的韓式燒肉是主要項目，求其叫幾碟牛肉，碟碟都咁靚，肥瘦適中，冇筋冇渣，係咁意一燒，蘸甜醬油吃，吃一碟牛肉，灌一大杯生啤，一樂也。直覺上覺得啲牛肉靚到有啲接近假，思疑係基因複製牛嘅複製牛肉。
電波少年謝昭仁隆重介紹燒鰻魚飯專門店，揸住手繪嘅地圖專誠拜訪，皇天不負有心人，肥美的鰻魚厚厚的一大塊，可以大大啖噬之，魚皮烤至微焦帶脆，魚肉雪白細緻，胖嘟嘟的白飯混合鰻魚燒汁，似餸菜多過似飯。午夜，想起「元祿」的油甘魚及即叫即燒的鰻魚飯，口水不禁啷吓啷吓……