會計界嘅譚香文屋漏偏逢連夜雨，公投動議轉軚俾泛民主派勁片，就連佢嗰行都好似對佢嘴藐藐，八方聽聞會計師公會喺月底搞嘅周年晚宴，竟然漏咗派帖畀譚香文。
八方問譚香文，會計師公會係咪咁唔畀面？譚香文話，你問吓公會啦，佢就的確無收過公會嘅帖，只不過係電話通知，可見會計師都好有正義感。
譚香文近排多新聞，上星期又因為《稅務條例》佢阿姐要帶埋業界人士出席與官員會面嘅問題，喺立法會同財經事務及庫務局局長馬時亨「開大片」，重要勞煩民主黨李華明做和事老。有在場嘅人同八方講，場面極之火爆，搞到連「大班」鄭經翰都驚出事，要同譚香文講：「馬時亨係潮州人，你再激佢就會動粗，女人都照打㗎！」佢先死死氣停口。
講番呢單嘢，譚香文話已「搞掂晒」，馬時亨大人有大量（當日譚小姐話要向記者唱衰馬仔亨……），大家都無事啦，譚小姐新嚟新豬肉，若然激到俾馬局長打佢兩巴，都算開創歷史吖。
（圖）譚香文前排差啲激到馬時亨局長動粗。資料圖片
傳真︰2623-9278
電郵︰