由紅姑鍾楚紅任代言人嘅日本健康產品美由奈，嚟緊會進攻男士巿場，早排廣告商努力物色男藝人做代言人，起初心水就有木村拓哉、金城武同埋郭富城，後嚟佢哋覺得城城同木村嘅身形線條都好靚，加上當時木村主演嘅《2046》上畫冇耐、而城城又開演唱會，兩個人氣都夠旺，所以就鎖定喺兩個入面揀一個。
最後城城打低木村，簽咗兩年合約做該品牌香港同日本方面嘅代言人，雖然佢哋應該係聯絡咗木村先，但係木村嗰邊懶懶閒，因為聽講幫木村傾嘢嘅經理人有十幾個，拍電視、電影、廣告都要搵唔同嘅經理人，廣告又分咗好多種類，單係搵啱對象去傾都要兜十幾個圈。
不過城城方面就簡單得多，只要搵小美就得，加上城城喺日本都有啲知名度，啱啱佢嘅演唱會又有不俗口碑，重打算喺十二月中加場，再講城城呢排嘅身形又真係keep得幾弗，各方面都符合晒做代言人嘅條件，馮仁昭問過小美，佢話係會同美由奈有合作，但係詳情都係由廣告商嗰邊公布喎。
台灣名模林志玲前日喺台灣先後出席義賣活動同簽名會，行程緊密，其間主辦單位重為佢舉行生日會，預祝生辰。對於俾人話需要賺快錢，林志玲話：「家裏並不需要我出來賺錢，我只能說，現在的這些好運與機會，都是我以前很想得到的，所以我會認真做每一份工作。」
馬浚偉噚日起程去加拿大多倫多登台，今次一去就要去成十幾日，咁佢公司咪叫啲記者去送佢機囉，本來約好晒時間，點知馬仔早到，佢知道有記者後，就即刻話唔舒服要去買嘢，之後一去就冇回頭，原來佢所謂嘅買嘢就係代表入閘，真係估佢唔到。
吳家樂噚日約埋梁思浩去葵芳幫「福幼基金會」義賣福袋，家樂仔話有啲藝員問佢義賣福袋有冇收酬勞，或者有冇車馬費，搞到佢好勞氣，家樂仔話：「做善事都講錢，重問我有冇車馬費，你要我咪畀二十蚊你囉！」
江華噚日喺新城接受訪問，佢話自己雖然唔係佛教徒，不過自小同佛教有淵源，前幾年睇過一本書後，就開始咗食齋。江華又話今個星期四會去台灣禪修八日，所以會缺席無綫台慶。問佢係咪同無綫有拗撬，佢就話：「同無綫關係好好，冇拗撬，只係今次呢個禪修活動機會難得啫。」
