港股上周走勢出現突破，恒指一度升上13822，收13784，全周上升289點，且大升的兩日都有過200億元的大成交配合，新上升浪確認，預期升到前高位14000水平會有反覆，整固後可向更高位推進。
藍籌氣勢如虹，金融股由滙控（005）帶頭，地產股亦發力。大行看好港樓市，預期未來1年樓價仍有15%至20%上升空間，現水平可繼續持有地產股，太早沽售會後悔。
國企指數已升上4800水平，下一個目標係5000。國企今個升浪由金屬原料和電機股帶動，預期落後股會接力，特別係石化股，已停咗好耐，一破位而上，可收復失地。
大市今個升浪頗為全面，藍籌、國企同二三線股，各領風騷，幕後人亦紛紛熱身。唔少二三線股強勢畢呈，但散戶好機靈，雖跟風炒賣，都以唔上身為主，而大戶亦未見有散貨迹象。
散戶未瘋狂，呢次二三線股嘅大升浪，相信仍係在起步階段，唔排除日後再升多幾成，甚或以倍計。
藍籌地產股升勢再現，中小型地產股亦蓄銳待發。莊士機構（367）上周五有異動，收報0.66元，升3.1%。佢喺0.65元水平造完支旗，只要升破0.68元阻力，下一個目標，將指向0.85元。
莊士係地產股中的小寶藏，因為資產夠厚，股價大幅折讓得唔合理。04年3月底止，莊士股東資金27.05億元，每股淨值1.87元，家吓折讓65%，就算升上0.9元，折讓仍超過50%！而且重未計算內地地產項目重估升值之數。重有，樓市好景，莊士租金收入增加，又有新盤開售，現年度盈利估計應有1.5億元，預測PE亦只係6至7倍。
中國科技（985）停牌，傳搞重組同注資，今後又多一家公司要留意。中科股東有何鴻燊（持8%權益），之前搞過賭業，家吓則以投資控股為主。
今年4月，公司配售兩成新股，接貨者有河北省官方單位，今次注資，相信同河北省官商的關係會更為強化，集團亦會向實業轉型，成為「有盈利、有前景、同高增長」的公司。
郭兆誠