自從世紀城市（355）系藉着地產股復甦同埋搞掂債務重組，炒到不亦樂乎之後，小初與成班老友就成日諗，究竟幾時輪到麗新發展（488）搞番場大反撲。剛好麗新系上周五公司業績大幅改善，大家就不約而同地認為，睇嚟𠵱家都係時候矣。
不過，麗新系一門四傑之中，似乎以麗豐控股（1125）最有條件首先跑出炒起。麗豐公布截至今年7月全年業績，錄得盈利1.728億元，勁升近39倍。
事實上，市場上多隻大陸地產股，近排股價回升唔少，作為一隻有業績支持嘅大陸地產股，麗豐理論上唔應該被拋離太遠，況且家陣時興澳門概念，麗豐又話唔排除會跟同系嘅豐德麗（571）響澳門發展電視城的住宅發展部份，所以話要搵藉口炒作，麗豐完全夠條件。
重有，麗豐年內搞過一次供股，所以一來有水，二來貨源夠歸邊，所要要炒起上嚟應該唔太高難度。麗豐上周五最高見0.249元，收0.238元，升4.39％，成交股數4934.6萬股，金額1173萬元。
慕容小初