耗資四億港元，經過十七個月施工嘅沙田馬場天幕馬匹亮相圈工程，噚日響第七場香港盃預賽舉行前，舉行竣工儀式，出席嘅嘉賓包括政務司司長曾蔭權、旅遊發展局主席周梁淑怡、承建及設計公司松田平田株式會社社長中園正樹等，場面熱鬧。
馬會大董施文信話天幕亮相圈嘅啟用，象徵沙田馬場成為世界上最先進嘅馬場，足以令每一位香港馬迷自豪；響佢發言期間，亮相圈嘅活動天幕徐徐打開，令到馬迷起哄及驚歎不已。而竣工儀式結束後，香港前馬王「靚蝦王」就客串做儀仗馬，帶領十匹香港盃預賽參戰馬行圈，現場馬迷都對亮相圈嘅設備及環境相當滿意。結果兩場戲肉香港盃預賽及香港旅遊盃，分別由「好利多」及「金像明星」勝出，曾蔭權及周梁淑怡負責頒獎。
此外，今季較少喺馬場露面嘅馬會前大董榮智健，噚日都有嚟參觀天幕馬匹亮相圈，兼且替名下嘅「驕陽」打氣，結果佢隻愛駒臨場票數強勁，以三點九倍勝出，執番六十三萬獎金，係繼去年四月嘅「金鏢」後，再一嘗拉頭馬嘅滋味。
傳真︰2623-9278
電郵︰
