上個星期喺美國上畫嘅電影當中有幾部表現唔錯，其中由雲妮絲惠嘉（ReneeZellweger）主演嘅《BJ單身日記：愛你不愛你》，雖然票房成績只係排第五，暫收三百萬美金（約二千四百萬港元），不過套戲喺全美只有五百幾間戲院上映，拉勻嚟計，《BJ》其實係平均每間戲院最收得嘅電影。
《BJ》嘅票房咁掂，究竟有乜原因呢？今集故事除咗繼續圍繞肥BJ雲妮周旋於老實男友哥連卓夫（ColinFirth）同花心舊情人曉格蘭特（HughGrant）之外，部戲分別去到奧地利、泰國同意大利實地取景，成本跳升近兩倍。
而肥BJ呢期多咗唔少動作場面，雖然佢嘅片酬加到約八千五百萬港元，係上集嘅三倍，但真係一啲都唔易賺。
好似雲妮喺奧地利拍一場同哥連卓夫滑雪度假嘅戲，要臨時學習唔同嘅滑雪花式，不過佢仍堅持親身上陣，重跌咗幾次先成功。而雲妮拍跳降傘降落喺豬欄嗰場戲，亦因為太攰，一拍完就索性瞓喺豬欄入面休息。
此外，前星期喺美國開畫大破票房紀錄嘅迪士尼動畫《超人特工隊》，上星期喺票房嘅表現依然理想，單喺上星期五一日，就賺到一千四百九十萬美元（約一億二千萬港元）嘅收入，而上星期三新上畫嘅華納動畫《北極快車》，暫時以六百五十萬美金（約五千萬港元）排第二，以現時走勢嚟睇，《超》片應該可以蟬聯美國周末票房冠軍。