足智彩今季對荷甲賽事全面開盤受注，我求大俠喜見三色台仍有呢個聯賽直播；但佢哋對當中球隊譯名矯枉過正嘅態度，實不敢恭維！
好似上周六場直播，如果唔係有隊燕豪芬喺度，有幾多球迷知道威廉二世就等如「蒂爾堡」？直播途中，評述員報道其餘賽事戰果，甚麼「阿納姆」領先，買咗海倫芬嘅球迷都唔知原來隊波輸緊畀維迪斯！
其實佢哋係取用呢啲球隊嘅地方名做譯名，但做呢個決定嘅人士，一係就完全冇sense，一係就自居於「這才是正宗」嘅井底裏面。𠵱家個氣候梗係以馬會嘅譯名最為人熟知啦，你咁有性格，以後將阿積士叫做阿姆斯特丹吖笨！
水晶宮前晚輸畀利物浦，開賽前突然唔見咗射手安迪莊臣，原來呢位新紮前鋒因為股肌受傷缺陣，但係就認真唔合時，原本一直有傳佢有機會入選英格蘭國家隊，錯過呢場聯賽，順理成章唔入選。其實，對西班牙係友賽，絕對係代表國家隊處子登場最佳場合，惟有歎句唔好彩。
曼聯行政總裁基爾早前公布，話近幾年世界球壇經濟轉型關係，球會收入減，唔排除改變球員薪酬政策，減輕負擔，有傳周薪九萬鎊嘅隊長堅尼會率先遭減薪兩成半，其他好似蘇斯查、傑斯等都成目標。車仔隊長泰利獲球會加薪一倍到九萬鎊，曼聯連首席富豪球會之譽都受考驗。
前晚維拉利爾作客輸畀畢爾包，話說佢哋本來想用新簽入嘅蘇連落場搏殺，賽前幾個鐘俾國際足協否決咗，如意算盤打唔響。據講國際足協唔容許維拉利爾偷步簽人，家陣蘇連要到一月轉會市場開番後至有資格落場。呢場波有蘇連唔代表維拉利爾一定唔輸，打亂部署確係事實。
上周六英超「大」風吹，淨係熱刺對阿仙奴都有成九個入球出現，全日八場亦有成六場波開「大」，就連「車仔」都唔再玩小勝一比○呢個鐵膽。不過，重有個「一比○專家」喺度，咪就係愛華頓囉！連埋呢場小勝伯明翰，佢哋今季已累積七場贏一比○，爭兩場就搶過「車仔」頭嘞。