西九龍民愚偽術區項目，即時激化為一個政治炸彈，連阿董出席公開場合，寧願主動講○七○八雙普選，對於西九龍民愚偽術嘅種種質詢，耍手擰頭，一聽見就運路走。
三大財團爭奪大地皮，西九龍好似伊拉克嘅油田，邊個霸得到，邊個就可以做國際超級油霸。三大財團之中，邊一瓣至係布殊切尼嘅最強拍檔，一眼就呼之欲出，實力咁懸殊，唔怪得話事人煲呔曾，嗱嗱聲要喺六個禮拜之內完成「諮詢」。
「諮詢」會唔會淪為類似伊拉克臨時委員會主持之下嘅「總統選舉」？煲呔又被指為同自己玩下任特首鋪路，因此，有啲文化人就提出，索性將三個項目交出，由六百萬人公投決定，稱為「文化公投」。
咦，𠵱個意念又幾有創意喎。橫掂三件嘢望落都差唔多，個個都有個天幕，又有一大堆樓包圍，西九龍起好之後，若然真係屬於公眾，咁揀邊一個，梗係最好就由十八歲以上嘅全港市民一人一票公投決定喇。
西九龍民愚偽術大公投，有一個好處，就係三大財團嘅老細，都可以學田少選立法會咁，着住T恤牛仔褲，企喺旺角砵蘭街及尖沙嘴廣東道等，向路人各自派單張拉票。香港人出名易𠱁，啲豬肉檔檔主、賣魚阿嬸，見到李公子、郭炳湘、順德佬、矮仔陳等，位位以身家千億之尊，唔嫌棄滿手豬血魚鱗，個個笑騎騎咁埋嚟握手，猛sell自己個project，親民兼開放，嗰一刻好似隨時願意同你分身家咁，握咗之後，小市民三個月都唔捨得用隻手拿飯食呀，一定會促進社會和諧啫係咪？
所以話文化公投，就最公道。到時煲呔曾嘅角色，就變為類似大法官胡國興，只要唔搞出啲換票箱、驅逐候選人助理等等嘅醜聞，煲呔不但香港史留名，中央阿爺睇到佢手腳乾淨，處事咁公正，下任特首除咗我哋煲呔重有邊個呢又？
文化公投決定西九龍，交換公投確定雙普選，泛民主派亦冇聲出，亦拆除咗一個炸彈。阿董聽見西九龍三個字就急急腳走，可見呢單嘢係幾咁棘手，喺佢任內嘅夕陽時期，可以實現一次公投，阿董嘅歷史聲譽將會一鋪翻身，由中方傀儡跳升為特區民主之父㖭！
三大財團接受公投民主洗禮，任由啲選民鍾意「活力星國際」嘅長蛇獻瑞格，定係貪「生利發展」個名生生發發好意頭，定係鍾意「香港薈萃」建議書裏面嗰條水柱夠旺，交由全民決定。既然係公投決定，又應唔應該請番太古入圍呢？若然公投結果竟然係英資太古贏，即是港人假借公投名義表達親英緬懷殖民地嘅感情，又會唔會變咗由人大再釋法，否決咗太古先再嚟過呢？
傳真︰2623-9278
電郵︰