強悍嘅葉太因為《基本法》23條而落台，而一直力撐23條嘅律政司司長梁愛詩，地位就仍然穩固。香港青年大專學生協會出版嘅《大學生報》早排訪問咗梁司長，梁愛詩向學生仔承認，政府喺沙士同經濟低迷嘅非常時期，重係咁推23條，解又解得唔好，令巿民感到不安，先至會令7．1咁多巿民上街發洩，佢重話巿民咁做係有道理嘅。咁唔知出年7．1，司長會唔會鼓勵巿民上街表達一下不滿呢？
學生問佢做咗七年司長攰唔攰。梁愛詩唔肯正面答滿唔滿意自己嘅表現，但就好坦率咁話，如果有更好嘅人選，佢情願做番律師。原來佢覺得做律師嘅自由度比較大，可以自己揀case嚟接，只要當事人滿意就得，但做公職就無得揀，重要全港巿民都滿意。司長其實重講漏咗，做律政司司長除咗要令香港市民滿意，重要令北大人放心，都真係唔易做㗎！
傳真︰2623-9278
電郵︰