上周五美國期油再跌1美元，1周跌幅4.6%。油價下跌，有利美股。港股喺美股帶動下，個勢繼續向上。
和黃C輪：和黃主角C輪2157上周五異動得好巴閉。正股（013）不過升75仙，輪價就算跟足，都只係升7.5仙，但2157升夠18仙（升33%），突晒章，交投量112球又大增逾3倍，代表正股有好戲就快上演，主角輪行先步。
𠵱家出擊和黃C輪，可以揀升得少啲嘅，例如2273（只升4.5仙），亦可揀數據靚嗰隻，例如9132（幾乎平水，槓桿率又唔低）。
滙控C輪：滙控（005）上周五喺美國市場郁得好厲害，ADR收87.82美元，升1.21美元，折合136.5元（本港當日收134.5元），睇嚟滙控C輪繼續搶上。上周五，4441升17仙，4440升18仙，2141升18仙，9894升20仙。4445升得較少，只有13仙，就買呢隻。4445明年6月到期，輪價83仙，負溢價0.2%，槓桿率16.2倍。既然負溢價，唔使理有效槓桿率同引伸波幅。
中電信C輪：中電信（728）喺網通（906）招股條件落實後，日日強勢。炒中電信C輪，穩穩陣陣，揀4499，槓桿率雖然麻麻，但勝在壽命長、溢價低。
章盛