日韓興啲乜：<br>弘大跳蚤沒有商品只有作品

日韓興啲乜：
弘大跳蚤沒有商品只有作品

提起跳蚤市場，即時諗起維園的Farm，無奈近來有人抱怨愈睇愈無癮，皆因有不少大路街邊商品入侵，令Farm女人街化，完全失去「跳蚤」意義！所以今次參觀韓國這個「FreeMarket」，絕對令人興奮！因為擺賣的全是「作品」而不是「商品」，件件100%人手製作，只此一家，並且每個星期六都會人頭湧湧，好熱鬧，𠵱家就齊齊Feel吓咩叫原創精神！
記者：張銘恩
攝影：陳陶鈞

■雲吞仔檔口，最受學生哥歡迎，因為粒粒都唔同表情，Yeah！

■勁Cute雲吞仔！有買趁手！

弘大學生創意發源地
FreeMarket成立於2002年，位近韓國著名美術學院弘益大學對開小公園，每個周末總有數十個攤檔在此擺賣，作品大多都是小手作如紙品、銀器、冷帽、手繪布袋等等。檔主們多是弘大的美術系學生，放假時便在此將心血與人分享。由於這是個OpenMarket，所以冬季便會休業，本月正是今年最後機會一訪此地，錯過的話又要等到明年3月先再見㗎喇！

■滙集藝術的地方，街頭藝術Graffiti又點少得？而且重係布滿整座廁所㖭呀。

齊齊HappyHour
「FreeMarket」打正旗號鼓勵創作，與眾交流，所以大會設有俾大家一同參與的攤位，特闢一角俾人DIY銀飾，免費提供導師及所需工具，可惜要出示學生證先至玩得。另外又有小型音樂會，令當地寂寂無聞的音樂人有機會在此與別人分享自己的創作，所以大受年輕人歡迎。

■DIY銀器班，由細細件飾物學做起，所以學員通常都由戒指學起。

■無論Rock友定係民歌一族，都一樣可以喺度「眾樂樂」。

精選「作品」全面睇
怕羞餃子檔學生最Buy
「餃子~~雲吞~~又大粒又爽口~~~」呢個攤位長時期人頭湧湧，擠身而入，原來是一籠籠可愛布餃子同雲吞仔！每粒表情同賣相都唔同，個個面豬登都紅卜卜，好似一大班怕羞仔咁，好鬼死Cute！難怪吸引大量學生哥兒們即時科水啦。設計人小朴，場內大呼：「大家一場嚟到，一定要試吓我啲手勢！」佢平日係OL，閒時重喜歡畫吓畫，由於勁鍾意食餃子，所以星期六在此充當大廚，搓出大粒小粒的餃子同雲吞，俾客人品嘗，手工精緻用料上乘，老土一句唔買都要睇吓。

網址：www.altoon.net

■餃子原子筆4,000韓圜（約$28），電話繩大4,000韓圜（約$28），細3,000韓圜（約$21）。

型人自製音樂品牌
全場至簡約地攤，只有一部潮爆SONYCD機，不停播放檔主MOJAVE自己Mix的電子音樂，風格帶點HipHop及Jazz元素，價錢超平，分明是旨在交流，不在搵銀！

■卡式錄音帶每餅2,000韓圜（約$14)、CD每隻4,000韓圜（約$28)，兩樣齊買5,000韓圜（約$35)。

潮女手畫紙品玩樣衰
另一令人不禁注足觀看的攤位，因為這位姐姐實在太有型！冬菇頭配大膠框眼鏡，而擺賣的全是紙品，再加上她以蠟筆畫成的公仔，全部怪形怪相，非常過癮。

■揭頁式記事簿，有多款不同封面，全部獨一無二，11,000韓圜（約$77）。

老外有斬獲
來公幹的德國人Anna（右）同法國朋友Pascal（左），因為有韓國地膽朋友所以識嚟，兩人高舉戰利品頸巾與番梘，同時高呼「WeLoveThisMarket！」

同場推介

■走Cutie路線的硬紙皮製品，可人兒檔主極力推介手上的大頭Memo板，10,000韓圜（約$70）。

■真人演繹阿姐賣靚遮，以防水顏料製作，落雨都唔怕，35,000韓圜（約$245）。

■多款手做番梘及潤唇膏，賣相同顏色都無得頂，2,000韓圜起（約$14起）。

■自製銀器香港見得多，不過以星座為吊墜造型的都算罕見啩！20,000韓圜（約$140）



FreeMarket詳情
舉行日期：2004年3月至11月
時間：逢星期六1:00pm至6:00pm
地址：弘益大學前對開小公園
交通：地鐵2號線弘大入口站落車，6號出口，沿西鐵路斜路轉卧牛山道，弘益大學對開右轉便見小公園。
網址：www.freemarket.or.kr