九龍華仁同香港華仁兩間學校有成八十年歷史，咁多年嚟出過唔少名人同高官，當中包括政務司司長曾蔭權、合和主席胡應湘同埋立法會議員梁家傑。三人噚日一齊出席華仁嘅校慶活動，大講華仁情。
有華仁舊生問胡應湘，咁多年嚟好多華仁仔做官、營商，會唔會因為唔同政見而發生衝突，令華仁仔自傷殘殺。胡主席即刻話華仁唔係黑社會，唔會自己人打自己人，強調華仁仔好團結，個個都係「自己人」。台下曾司長即陰陰嘴咁笑，唔知諗緊個西九計劃冇胡應湘份，定係諗緊胡主席搞極都搞唔掂嗰個MegaTower呢？
講番華仁，校慶活動今日進入壓軸高潮，日間有港九華仁聯合彌撒，由湯漢主教主祭。夜晚喺會展開大party，一百三十席成千二人，肯定冠蓋雲集。
（圖）胡應湘話華仁仔唔會自己人打自己人，唔通想叫煲呔識做照住？
傳真︰2623-9278
電郵︰